प्रधानमन्त्रीको रविमाथि आरोप: भिजिट भिसामा विदेश गए, नेपाली नागरिकता त्यागे, विदेशमै दुई-दुई विवाह गरे, सहकारी ठगी

प्रधानमन्त्री केपी शर्मा ओलीले बुधबार प्रतिनिधि सभामा सम्बोधन गर्दै राष्ट्रिय स्वतन्त्र पार्टीका सभापति रवि लामिछानेमाथि तीव्र आलोचना गरे। तुर्कमेनिस्तान भ्रमणबारे जानकारी दिँदै उनले सहकारी ठगी प्रकरणमा लामिछाने र रास्वपाका सांसदहरूलाई लक्षित गर्दै संसद्‌मा कपटपूर्ण बहस भइरहेको आरोप लगाए।

ओलीले भने, “देशको हितमा बहस हुनुको सट्टा संसद्‌लाई झुठा कथा र सामाजिक सञ्जालका लागि कन्टेन्ट उत्पादन गर्ने थलो बनाउने प्रयास भइरहेको छ।” उनले लामिछानेमाथि सरकारले प्रतिशोध साँधेको भन्ने आरोपलाई अस्वीकार गर्दै अदालतले थुनामा पठाएका अन्य व्यक्तिहरूलाई पनि कानुनी प्रक्रिया अनुसार कारबाही भइरहेको स्पष्ट पारे।

उनले थपे, “सहकारीमा अर्बौं अपचलनका मुद्दामा सयौं व्यक्ति थुनामा छन्। तर एक व्यक्तिमाथि मात्रै ‘राजनीतिक प्रतिशोध’ भन्ने कथा बनाउनु न्यायको हत्या हो।” रवि लामिछानेले भिजिट भिसामा विदेश गएका, नेपाली नागरिकता त्यागेका र विदेशमै दुई विवाह गरेको प्रसंग उठाउँदै ओलीले उनको आचरणप्रति प्रश्न उठाए।

ओलीले संसद्‌मा यस्ता विषयले भ्रम सिर्जना गर्ने र जनताको ध्यान अन्यत्र मोड्ने काम गरिरहेको भन्दै चिन्ता व्यक्त गरे। उनले प्रतिपक्षमा रहे पनि जनताको मत लिएपछि देशप्रति जिम्मेवारी बहन गर्नुपर्ने धारणा राखे।