रवि लामिछानेविरुद्ध उजुरी नै नदिएको मलाई सर्वोच्चले किन वादी बनायो? - नारायण पहराई

काठमाडौं, २०८१ जेठ १२ गते । सहकारी ठगी प्रकरणमा आफ्नो नाम दुरुपयोग भएको भन्दै नारायण पहराईले सर्वोच्च अदालतको पछिल्लो आदेशप्रति गम्भीर आपत्ति जनाएका छन्। रवि लामिछानेको बन्दी प्रत्यक्षीकरण मुद्दामा सर्वोच्च अदालतले दिएको आदेशमा समेत आफ्नो नाम वादीका रूपमा उल्लेख गरिएको पाइएपछि पहराईले तीव्र आक्रोश व्यक्त गरेका हुन्।

सामाजिक सञ्जालमार्फत आफ्नो भनाइ सार्वजनिक गर्दै पहराईले आफूलाई यो देशमा बाँच्ने अधिकार नभएको हो कि भन्दै प्रश्न गरेका छन्। उनले सरकारले आफूप्रति प्रतिशोध साँधेको आरोप लगाउँदै आफू जाहेरीकर्ता नभएको कुरा पटक-पटक बताउँदा पनि आफ्नो नाम दुरुपयोग गरिएको गुनासो गरेका छन्।

"मैले यसअगाडि पनि जाहेरीकर्ता नभएको सादा निवेदनलाई जाहेरी बनाएर मेरो नाम दुरुपयोग गरेको जानकारी गराएकै थिएँ," पहराईले भनेका छन्, "हिजो सर्वोच्च अदालतबाट आएको आदेशमा पनि मेरै नाम उल्लेख गरी वादी बनाएर राखिएको रहेछ।"

आफूले कुनै पनि उजुरी नदिएको अवस्थामा कसरी उजुरीकर्ता वा वादी बनाइयो भन्दै उनले प्रश्न गरेका छन्। "मेरो तर्फबाट दिँदै नदिएको उजुरीलाई उजुरीकर्ता बनाउन पाइन्छ र? एउटा निवेदनलाई कुन आधारमा उजुरीकर्ता बनाइयो?" पहराईको प्रश्न छ, "सयौं बचतकर्ताको निवेदन थियो, मेरै निवेदनलाई उजुरी कसरी बनाइयो?"

पहराईले यस विषयमा कानुनी उपचार खोजिरहेको पनि बताएका छन्। विशेष गरी, रवि लामिछाने थुनामा परेको विषयमा आफ्नो नाम जोडेर आएका खबरप्रति उनले असन्तुष्टि व्यक्त गरेका छन्। "मेरै कारणले रवि लामिछाने थुनामा परेका हुन् भने म यो पापको भारी बोक्न चाहन्नँ," उनले भावुक हुँदै भने, "कृपया दया गरी मेरो उजुरीकर्ताबाट नाम हटाइदिनुहुन विनम्रताका साथ अनुरोध छ।"

उनले आफू मात्र नभई अन्य धेरै बचतकर्ताहरूलाई पनि जानकारी नै नदिई उजुरीकर्ता बनाइएको खुलासा गरेका छन्। "यस बारेमा अब सबैले बोल्नुपर्छ," पहराईले आह्वान गरे, "राज्यले अति होइन, अत्याचार नै गर्‍यो।"