प्रधानमन्त्री ओलीलाई बालेनको प्रश्न: "के तपाईँको सुशासनको अर्थ बालिकाको मृत्यु भएपछि गोहीको आँसु र १ लाख हो?"

काठमाडौंका मेयर बालेन शाहले प्रधानमन्त्री केपी शर्मा ओलीलाई गम्भीर प्रश्न गरेका छन्। आज सामाजिक सञ्जाल फेसबुकमा स्टाटस लेख्दै उनले यो प्रश्न गरेका हुन्।

एमाले सांसद रेखा शर्माले नाबालिकालाई घरेलु कामदार राखेर बन्धक बनाएर कुटपिट गरेको सन्दर्भ उठाउँदै केपी ओलीलाई अदालतले आदेश दिँदा पनि किन कारबाही गर्न नसकेको, यही हो तपाईँको सुशासन भन्दै प्रश्न गरेका हुन्।

"के तपाईँको सुशासन बालिकाको मृत्यु भइसकेपछि सामाजिक सञ्जालमा गोहीका आँसु झार्दै १ लाख क्षतिपूर्ति दिने हो?" भन्दै गम्भीर प्रश्न गरेका छन्।

उनी लेख्छन्, "वहाँ हुनुहुन्छ नेकपा एमालेकी प्रदेश सांसद रेखा शर्मा। वहाँले विगत ८ वर्षदेखि बन्धक बनाएर एक जना नाबालिकालाई घरेलु कामदारको नाममा हिंसा गर्दै आउनुभएको छ, दैनिक रूपमा कुटपिट गर्दै आउनुभएको छ। काठमाडौं महानगरले विगत २ महिनादेखि कारबाही अघि बढाउनु भन्दा पनि यो सरकारले समाएको छैन। अदालतले पनि मुद्दा चलाउ भनेर भनी सकेको छ।

सम्माननीय प्रधानमन्त्री खड्ग प्रसाद ओलीज्यू,
सुशासन भनेको अदालतले पनि समाउ भनेको तपाईँको सांसद रेखा शर्मा, जसलाई बाल शोषण गरेको मुद्दा छ, समाउनलाई भन्दछ।
सायद तपाईँको लागि सुशासनको अर्थ सो बालिकाको मृत्यु पछि गोहीको आँसु चुहाएर फेसबुकमा समवेदना दिँदै एक लाख घोषणा गर्नु नै होला।"