बालेनलाई अनेरास्ववियूका अध्यक्षको चेतावनी– भारतीय खुफिया एजेन्सीको निर्देशनमा जनताको आँखामा छारो नहाल्नू

नेकपा एमालेको भातृ संगठन अखिल नेपाल राष्ट्रिय स्वतन्त्र युनियन (अनेरास्ववियू) का अध्यक्ष समिक बडालले काठमाडौँ महानगरपालिकाका मेयर बालेन्द्र शाह (बालेन) माथि गम्भीर आरोप लगाएका छन्।

उनले बालेनले लाजिम्पाटस्थित होटल सांग्रिलाको पछाडि रहेको घर भाडामा लिएर भारतीय खुफिया एजेन्सीको निर्देशनमा काम गर्दै नेपाली जनतालाई भ्रममा पार्ने प्रयास गरिरहेको दाबी गरेका छन्।

सामाजिक सञ्जालमा बडालले बालेनलाई यस गतिविधिलाई तुरुन्त रोक्न आग्रह गर्दै, नेपाली जनताले छिट्टै उनको वास्तविकता बुझ्ने चेतावनी दिएका छन्। उनले फेसबुकमा लेखेका छन्, ‘काठमाण्डौ महानगरको मेयर बालेनजि साङ्ग्रिला होटेल पछाडी घर भाडा लिएर दैनिक भारतिय खुबिया एजेन्सीसगको निर्देशनमा नेपाली जनताको आखामा छारो हाल्न बन्द गर्नुस्। नेपाली जनताले तपाइको असलियत बुझ्ने दिन धेरै टाढा छैन्।’

यसैबीच, मेयर शाहले पनि नेकपा एमालेकी प्रदेश सांसद रेखा शर्माको फोटो सार्वजनिक गर्दै, नाबालिगमाथि ८ वर्षसम्म भएको हिंसामा किन कुनै कारबाही नगरेको भनेर प्रश्न गरेका छन्। बालेनले ओलीलाई प्रश्न गर्दै उक्त पोस्ट गरेको केही समयपछि समिकले बालेनमाथि आरोप लगाउँदै यो पोस्ट गरेका हुन्।