केपी ओली बने नेपालमै उत्पादित हाइड्रोजनबाट चल्ने कार चढ्ने पहिलो प्रधानमन्त्री

प्रधानमन्त्री केपी शर्मा ओलीले नेपालमै उत्पादन गरिएको ग्रीन हाइड्रोजन इन्धनबाट चल्ने कारमा सवार भएका छन्। शुक्रबार काठमाडौं विश्वविद्यालयको २९औं दीक्षान्त समारोहको दोस्रो चरणमा सहभागी हुने क्रममा प्रधानमन्त्री ओलीले हाइड्रोजन कार चढ्नुका साथै हाइड्रोजन रिफ्युलिङ स्टेशनको उद्घाटन पनि गरे।

प्रधानमन्त्री ओली विश्वविद्यालय परिसरबाट दीक्षान्त समारोह स्थलसम्म हाइड्रोजन कारमै सवार भए, जसले उनलाई नेपालमा उत्पादित हाइड्रोजन इन्धनबाट चल्ने कार चढ्ने पहिलो प्रधानमन्त्री बनाएको छ।

समारोहपछि, उनले विश्वविद्यालयमा हाइड्रोजन सम्बन्धी शोधमा संलग्न विद्यावारिधि गर्ने विद्यार्थीहरूसँग अन्तरक्रिया गरे। उनले नेपाल सरकारले ग्रीन हाइड्रोजन प्रविधिलाई व्यावसायिक रूपमा अघि बढाउन आवश्यक नीति नियमहरू चाँडो नै ल्याउने प्रतिबद्धता पनि व्यक्त गरे।

काठमाडौं विश्वविद्यालयले नेपाल आयल निगमको सहयोगमा वि.सं. २०७७ साउनदेखि ग्रीन हाइड्रोजन प्रयोगशाला स्थापना गरी अनुसन्धान गर्दै आएको छ। यो अनुसन्धानले युरिया मल कारखाना, फलाम खनिज प्रशोधन, र सिमेन्ट उद्योगमा कोइलाको स्थानमा ग्रीन हाइड्रोजनको प्रयोगको सम्भावना अध्ययन गरिरहेको छ। यद्यपि, विश्वविद्यालयले उत्पादनमा सफलता प्राप्त गरे पनि यसको व्यावसायिक प्रयोगका लागि अझै केही समय लाग्ने देखिन्छ। यसैलाई मूर्तरूप दिन सरकारले राष्ट्रिय हाइड्रोजन नीति २०८० पारित गरिसकेको छ, र अहिले यसको कार्यान्वयनका लागि आवश्यक ऐन, नियम, निर्देशिका र कार्यविधिहरू निर्माणको क्रममा रहेका छन्।