जेठ १४ देखि सानिगाड हाइड्रोको आईपीओ खुल्दै

काठमाडौँ । सानिगाड हाइड्रो लिमिटेडले सर्वसाधारणका लागि जेठ १४ गतेदेखि प्राथमिक शेयर (आइपिओ)  निष्कासन गर्ने भएको छ । कम्पनीले प्रतिकित्ता १०० रुपैयाँ अंकित मूल्यका ४६ लाख ७४ हजार कित्ता शेयर बिक्री खुला गर्न लागेको हो ।

कम्पनीका अनुसार उक्त आइपिओमा जेठ २० गतेसम्म आवेदन दिन सकिनेछ । सो अवधिसम्म सबै शेयर बिक्री नभएमा निष्कासन अवधि जेठ २८ गतेसम्म लम्ब्याइनेछ ।

कम्पनीको जारी पूँजी २ अर्ब ८५ करोड रुपैयाँ रहेको छ । यसमध्ये ३० प्रतिशत अर्थात् ८५ लाख ५० हजार कित्ता शेयर सर्वसाधारणका लागि छुट्याइएको छ ।

यसअघि कुल जारी पूँजीको १० प्रतिशत अर्थात् २८ लाख ५० हजार कित्ता शेयर बझाङ जिल्लाका आयोजना प्रभावित स्थानीय बासिन्दालाई वितरण गरिएको थियो । बाँकी २० प्रतिशत अर्थात् ५७ लाख कित्ता शेयर सर्वसाधारणका लागि छुट्याइएको हो ।

सर्वसाधारणतर्फ छुट्याइएको शेयरमध्ये १० प्रतिशत अर्थात् ५ लाख ७० हजार कित्ता वैदेशिक रोजगारीमा रहेका नेपालीका लागि छुट्याइएको थियो ।

त्यसैगरी, कुल निष्कासनमध्ये ३ प्रतिशत अर्थात् १ लाख ७१ हजार कित्ता शेयर कर्मचारीका लागि तथा ५ प्रतिशत अर्थात् २ लाख ८५ हजार कित्ता शेयर सामूहिक लगानी कोषका लागि सुरक्षित गरिएको छ । बाँकी ४६ लाख ७४ हजार कित्ता शेयर सर्वसाधारणमा बिक्री खुला गरिनेछ ।

यस निष्कासनको बिक्री प्रबन्धक एलएस क्यापिटल लिमिटेड रहेको छ । लगानीकर्ताले न्यूनतम १० कित्तादेखि अधिकतम २० हजार कित्तासम्म आवेदन दिन सक्नेछन् ।

यसैबीच, इक्रा नेपालले सानिगाड हाइड्रो लिमिटेडको निष्कासनकर्ता मूल्याङ्कन स्तर वृद्धि गर्दै ‘डबल बी माइनस’ रेटिङ प्रदान गरेको छ । यसअघि कम्पनीलाई ‘बी प्लस’ स्तर दिइएको थियो । यस्तो मूल्याङ्कन प्राप्त संस्थालाई वित्तीय दायित्व समयमै भुक्तानी गर्न मध्यम जोखिमयुक्त मानिन्छ ।

सानिगाड हाइड्रो लिमिटेड सन् २००७ डिसेम्बरमा निजी कम्पनीका रूपमा स्थापना भएको थियो । पछि कम्पनीलाई सन् २०२१ जुलाई १४ मा सार्वजनिक कम्पनीमा रूपान्तरण गरिएको हो ।

हाल कम्पनीले सुदूरपश्चिम प्रदेशको बझाङ जिल्लामा ३८.४६ मेगावाट क्षमताको माथिल्लो कालंगा गाड जलविद्युत आयोजना सञ्चालनमा ल्याइसकेको छ ।