कृषिमन्त्री अधिकारीले दिए सरकारबाट राजीनामा

कृषि तथा पशुपन्छी विकास मन्त्री रामनाथ अधिकारीले मंगलबार बिहान सरकारबाट राजीनामा दिएका छन्। भदौ २३ गतेको ‘अलोकतान्त्रिक कदम’ र त्यसपछिको दमनको विरोधमा उनले पद त्यागेको घोषणा गरेका हुन्। सामाजिक सञ्जालमार्फत जारी विज्ञप्तिमा अधिकारीले आफूलाई अपराधबोध भएको र सरकारको व्यवहार नैतिकताको विरुद्ध रहेको उल्लेख गरेका छन्।

उनले लेखेका छन्, “लोकतन्त्रमा प्रश्न सोध्नु र शान्तिपूर्ण विरोध गर्नु नागरिकको नैसर्गिक अधिकार हो। यसको सट्टामा भएको व्यापक दमन, हत्या र बल प्रयोगले हामी लोकतन्त्रतर्फ नभई तानाशाही व्यवस्थातर्फ उन्मुख भइरहेको हो कि भनी म झस्किएको छु।” अधिकारीले कलिला छोराछोरीहरूको हत्या र दमनपछि सरकारमा बसिरहनु आफ्नो नैतिकता र दलको शिक्षाको खिलाफ हुने बताएका छन्।

धादिङ २ बाट नेपाली कांग्रेसका तर्फबाट प्रतिनिधिसभा सदस्यमा निर्वाचित अधिकारी असार ३१ गते मन्त्री बनेका थिए। उनले आफ्नो दलको लोकतान्त्रिक इतिहासप्रति गर्व रहेको र अहिंसा लोकतन्त्रको प्राण हो भन्ने सिद्धान्तमा अडिग रहेको बताएका छन्।

राजीनामा पत्रको अन्त्यमा उनले लेखेका छन्, “हामीभन्दा माननीय र सम्माननीय हाम्रा सार्वभौम जनता हुन् भन्ने चेतना हामी ‘नेता हौं’ भन्नेहरूमा विकास होस्।” अधिकारीको यो निर्णयले जेनजी आन्दोलनको पृष्ठभूमिमा सरकारभित्रको असन्तुष्टि झनै उजागर भएको छ।