सञ्चारमन्त्रीको पृथ्वीसुब्बा गुरुङको घरमा आगजनी

ललितपुरको सुनाकोठीस्थित सञ्चारमन्त्री पृथ्वीसुब्बा गुरुङको निवासमा मंगलबार बिहान जेनजी आन्दोलनका प्रदर्शनकारीहरूले आगजनी गरेका छन्। बिहानैदेखि तनावपूर्ण बनेको वातावरणमा प्रदर्शनकारीहरू प्रहरीको घेरा तोड्दै मन्त्रीको घरतर्फ अघि बढे। उनीहरूले ढुंगामुढा गरेपछि घरमा आगो लगाइएको थियो। आगलागी नियन्त्रणमा लिन दमकल टोली सक्रिय भए पनि क्षतिको विस्तृत विवरण आउन बाँकी छ।

जेनजी आन्दोलनले देशभरि नै तीव्रता लिँदै गएको छ। राजधानी काठमाडौंदेखि सुदूरपश्चिमसम्म युवाहरूको आक्रोश सडकमा देखिन थालेको छ। मंगलबार बिहान संसद भवन, गण्डकी प्रदेशसभा, भक्तपुर र दाङमा समेत प्रदर्शनहरू भएका छन्। केही स्थानमा प्रशासनले कर्फ्यू आदेश जारी गरे पनि प्रदर्शनकारीहरू रोकिएका छैनन्।

राजनीतिक वृत्तमा पनि आन्दोलनको प्रभाव देखिन थालेको छ। गगन थापाले प्रधानमन्त्रीले दमनको जिम्मेवारी लिएर राजीनामा दिनुपर्ने माग गरेका छन्। संयुक्त राष्ट्रसंघले समेत प्रहरी दमनबारे गम्भीर चासो व्यक्त गर्दै तत्काल छानबिनको माग गरेको छ।