वरीयतामा चौथो रहेका ऊर्जामन्त्री विराजभक्त श्रेष्ठ बने कार्यवाहक प्रधानमन्त्री

प्रधानमन्त्रीसँगै दोस्रो र तेस्रो वरीयताका अर्थमन्त्री वाग्ले र परराष्ट्रमन्त्री खनाल पनि भारत गएका छन् ।

Artha Kendra Artha Kendra
आइतबार, ६ मंसिर २०८३, ४:१४ PM
—
फन्ट
वरीयतामा चौथो रहेका ऊर्जामन्त्री विराजभक्त श्रेष्ठ बने कार्यवाहक प्रधानमन्त्री

काठमाडौं । प्रधानमन्त्री बालेन्द्र शाह भारत भ्रमणमा गएपछि ऊर्जा, जलस्रोत तथा सिँचाइमन्त्री विराजभक्त श्रेष्ठ कार्यवाहक प्रधानमन्त्री बनेका छन् । प्रधानमन्त्रीसँगै अर्थमन्त्री डा. स्वर्णिम वाग्ले र परराष्ट्रमन्त्री शिशिर खनाल पनि भ्रमण टोलीमा रहेकाले मन्त्रिपरिषद्को वरीयताक्रमअनुसार यो जिम्मेवारी श्रेष्ठको भागमा परेको हो ।

मन्त्रिपरिषद्मा प्रधानमन्त्री शाहपछि अर्थमन्त्री वाग्ले दोस्रो र परराष्ट्रमन्त्री खनाल तेस्रो वरीयतामा छन् । चौथो वरीयतामा रहेका ऊर्जामन्त्री श्रेष्ठले प्रधानमन्त्री स्वदेश नफर्किएसम्म सरकारको दैनिक कामकाज हेर्नेछन् ।

राष्ट्रपति कार्यालयमा पुग्यो पत्र

प्रधानमन्त्री शाहले आफ्नो अनुपस्थितिमा श्रेष्ठलाई कार्यवाहक प्रधानमन्त्रीको जिम्मेवारी दिन राष्ट्रपति रामचन्द्र पौडेलसमक्ष सिफारिस गरेका हुन् । सोही सिफारिसका आधारमा राष्ट्रपतिले श्रेष्ठलाई सरकारको दैनिक प्रशासनिक कामकाज सञ्चालनको जिम्मेवारी तोक्नेछन् ।

राष्ट्रपति कार्यालयका स्रोतका अनुसार प्रधानमन्त्रीको अनुपस्थितिमा श्रेष्ठले कार्यवाहक प्रधानमन्त्रीको जिम्मेवारी सम्हाल्ने जानकारीसहितको पत्र कार्यालयमा पुगिसकेको छ ।

सोमबार साँझ फर्किंदै प्रधानमन्त्री

भारतीय प्रधानमन्त्री नरेन्द्र मोदीको निमन्त्रणामा प्रधानमन्त्री शाह दुईदिने राजकीय भ्रमणका लागि आइतबार दिउँसो नयाँदिल्ली गएका हुन् । प्रधानमन्त्री बनेपछि छिमेकी मुलुकमा उनको यो पहिलो राजकीय भ्रमण हो ।

भ्रमणका क्रममा सोमबार प्रधानमन्त्री शाह भारतीय राष्ट्रपति द्रौपदी मुर्मूसँग शिष्टाचार भेट गर्नेछन् भने प्रधानमन्त्री मोदीसँग एकल तथा प्रतिनिधिमण्डलस्तरीय वार्ता गर्नेछन् । उनी सोमबार साँझ स्वदेश फर्किने कार्यक्रम छ ।

यो पोस्ट पढेपछि तपाईलाई कस्तो लाग्यो?

सेयर गर्नुहोस्

Comments

0 comments · join the conversation

No comments yet

Be the first to share your thoughts.