सुदूरपश्चिम पहिलो पटक एनपीएल च्याम्पियन : मुन्सेको अविजित १२५ रनमा लुम्बिनीलाई १० विकेटले हरायो

सुदूरपश्चिम रोयल्सले फाइनलमा साविक विजेता लुम्बिनी लायन्सलाई १० विकेटले हराउँदै पहिलो पटक एनपीएल उपाधि जितेको छ । जर्ज मुन्सेको अविजित १२५ रनको मद्दतमा सुदूरपश्चिमले १५६ रनको लक्ष्य १३.३ ओभरमै पूरा गर्‍यो ।

Artha Kendra Artha Kendra
शनिबार, ५ मंसिर २०८३, ८:२ PM
—
फन्ट
सुदूरपश्चिम पहिलो पटक एनपीएल च्याम्पियन : मुन्सेको अविजित १२५ रनमा लुम्बिनीलाई १० विकेटले हरायो

काठमाडौं । सुदूरपश्चिम रोयल्सले नेपाल प्रिमियर लिग (एनपीएल) क्रिकेटको तेस्रो संस्करणको उपाधि जितेको छ । कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा शनिबार भएको फाइनलमा सुदूरपश्चिमले साविक विजेता लुम्बिनी लायन्सलाई १० विकेटले पराजित गर्‍यो ।

लुम्बिनीले दिएको १५६ रनको लक्ष्य सुदूरपश्चिमले एउटा पनि विकेट नगुमाई १३.३ ओभरमै पूरा गर्‍यो । ओपनर जर्ज मुन्सेले ५४ बलमा ८ चौका र १२ छक्कासहित अविजित १२५ रन बनाए भने विनोद भण्डारी २७ बलमा ३० रनमा अविजित रहे ।

लगातार तेस्रो पटक फाइनल खेलेको सुदूरपश्चिमको यो पहिलो एनपीएल उपाधि हो ।

मुन्सेको विस्फोटक शतक

सुदूरपश्चिमले पावरप्लेको ६ ओभरमै विनाविकेट ६० रन बनाएको थियो । मुन्सेले २८ बलमा अर्धशतक र ४९ बलमा शतक पूरा गरे । ११ ओभर सकिँदा सुदूरपश्चिमको योगफल विनाविकेट १०८ रन पुगेको थियो ।

मुन्सेले अन्तिम तीन बलमा शेर मल्लविरुद्ध लगातार तीन छक्का प्रहार गर्दै खेल सके । सुदूरपश्चिमले ३९ बल बाँकी छँदै जित निकाल्यो । लुम्बिनीका कुनै पनि बलरले विकेट लिन सकेनन् । किशोर महतोले ३ ओभरमा ३८ र शेर मल्लले ३.३ ओभरमा ३४ रन दिए ।

स्कटल्यान्डका ओपनर मुन्सेलाई सुदूरपश्चिमले प्लेअफअघि मात्र टोलीमा भित्र्याएको थियो । दोस्रो क्वालिफायरमा उनी ८ रनमा आउट भएका थिए ।

लुम्बिनीको १५५ रन

टस जितेको सुदूरपश्चिमले फिल्डिङ रोजेपछि पहिले ब्याटिङ गरेको लुम्बिनीले २० ओभरमा ६ विकेट गुमाएर १५५ रन बनाएको थियो । दिलीप नाथले ३१ बलमा अविजित ३९, कप्तान रोहितकुमार पौडेलले ३०, निरोशन डिकवेलाले २८ र अली शेखले २४ रन बनाए ।

सुदूरपश्चिमका स्कट कुगलेइनले ४ ओभरमा २५ रन दिएर २ विकेट लिए । हेमन्त धामी, थरिन्दु रत्नायके र कप्तान दीपेन्द्रसिंह ऐरीले एक–एक विकेट लिए ।

दुई फाइनलको हारपछि उपाधि

सुदूरपश्चिम पहिलो संस्करणको फाइनलमा जनकपुर बोल्ट्स र दोस्रो संस्करणको फाइनलमा लुम्बिनीसँग पराजित हुँदै उपविजेता बनेको थियो । यो सिजन लिग चरण र पहिलो क्वालिफायरमा पनि लुम्बिनीसँग हारेको सुदूरपश्चिमले फाइनलमा भने एकतर्फी जित निकाल्यो ।

लगातार दोस्रो उपाधिको दाउमा रहेको लुम्बिनी यसपटक उपविजेता बनेको छ ।

यो पोस्ट पढेपछि तपाईलाई कस्तो लाग्यो?

सेयर गर्नुहोस्

Comments

0 comments · join the conversation

No comments yet

Be the first to share your thoughts.