कुलेखानी जलाशय लगातार बढ्दै, सतर्क रहन आग्रह

हेटौडा । मकवानपुरको कुलेखानी जलाशय (इन्द्रसरोवर) मा पानीको सतह बढिरहेको छ । बिहान ११ बजेको अपडेटअनुसार पानीको सतह बढेर १५२६.२३ मिटर पुगेको हो ।

निरन्तर ठूलो वर्षा भइरहेकाले पछिल्ला दिनको तुलनामा जलाशयमा पानीको सतह केही तीव्र गतिमा बढिरहेको जनाइएको छ ।

कुलेखानी जलाशयमा अधिकतम १५३० मिटरसम्म पानी भण्डारण गर्न सक्ने क्षमता रहेको छ । हाल जलाशयबाट पूर्ण क्षमतामा विद्युत् उत्पादन भइरहेको विद्युत् प्राधिकरणले जनाएको छ ।

जलाशयमा पानीको सतह १५२७ मिटर पुगेपछि पहिलो साइरन बजाइने र त्यसपछि पानीको सतह थप बढ्दै गएमा क्रमशः तीन पटकसम्म साइरन बजाइने जानकारी दिइएको छ ।

तीन पटक साइरन बज्ने अवस्था आउँदा जलाशयको पानीको सतह १५३० मिटर पुगेको हुने र त्यसपछि बाँधको मुख्य ढोका बिस्तारै खोलिने जनाइएको छ ।

निरन्तर ठूलो वर्षा भइरहेकाले जलाशयको पानीको सतहमा भइरहेको वृद्धिलाई प्राधिकरणसहित स्थानीय प्रशासनले निगरानी गरिरहेको जनाएको छ ।