कामना सेवा विकास बैंकको व्यवसाय विस्तारसँगै नाफामा बलियो उछाल

काठमाडौं, ०३ साउन । कामना सेवा विकास बैंकले आर्थिक वर्ष २०८२/८३ मा अधिकांश वित्तीय सूचकमा उल्लेखनीय सुधार गर्दै नाफा र व्यवसाय दुवै क्षेत्रमा उत्साहजनक वृद्धि हासिल गरेको छ।

बैंकले सार्वजनिक गरेको अपरिष्कृत वार्षिक वित्तीय विवरणअनुसार समीक्षा अवधिमा खुद नाफा ३३.५१ प्रतिशतले बढेर ८९ करोड ४१ लाख रुपैयाँ पुगेको छ। अघिल्लो आर्थिक वर्षमा बैंकले ६६ करोड ९७ लाख रुपैयाँ खुद नाफा आर्जन गरेको थियो।

त्यसैगरी, सञ्चालन मुनाफा पनि ३२.८७ प्रतिशतले वृद्धि भई १ अर्ब ३८ करोड २५ लाख रुपैयाँ पुगेको छ। खुद ब्याज आम्दानी भने ३.९८ प्रतिशतले बढेर २ अर्ब ४१ करोड ८ लाख रुपैयाँ पुगेको वित्तीय विवरणमा उल्लेख छ।

बैंकको वितरणयोग्य मुनाफा ६० करोड ११ लाख रुपैयाँ पुगेको छ। यसका आधारमा बैंकले हालको अवस्थामा करिब १५.१६ प्रतिशत लाभांश वितरण गर्न सक्ने क्षमता बनाएको देखिन्छ। साथै, रिटेन्ड अर्निङ ६० करोड ११ लाख रुपैयाँ र जगेडा कोष २ अर्ब १४ करोड १३ लाख रुपैयाँ पुगेको छ, जुन दुवै अघिल्लो आर्थिक वर्षको तुलनामा वृद्धि भएका हुन्।

व्यवसाय विस्तारतर्फ पनि बैंकले प्रगति कायम राखेको छ। आर्थिक वर्षभर बैंकले ६६ अर्ब १७ करोड ७५ लाख रुपैयाँ निक्षेप संकलन गरेको छ भने ५४ अर्ब २१ करोड १ लाख रुपैयाँ कर्जा प्रवाह गरेको छ। यी दुवै सूचक अघिल्लो वर्षको तुलनामा सुधारिएका छन्।

वित्तीय विवरणअनुसार बैंकको वार्षिकीकृत प्रतिशेयर आम्दानी (ईपीएस) २०.७५ रुपैयाँ, प्रतिशेयर नेटवर्थ १७१.०१ रुपैयाँ तथा पीई रेसियो २०.८४ गुणा कायम भएको छ। समग्रमा बैंकको वित्तीय प्रदर्शनले नाफा, पूँजी आधार र व्यवसाय विस्तार तीनै क्षेत्रमा सकारात्मक प्रगति भएको संकेत गरेको छ।