सिद्धार्थ बैंकको ४२ हजारभन्दा बढी संस्थापक सेयर बिक्री खुला, हालका संस्थापकलाई पहिलो प्राथमिकता

काठमाडौं, २४ असार । सिद्धार्थ बैंक लिमिटेड ले ४२ हजार ३०५ कित्ता संस्थापक सेयर बिक्रीका लागि प्रक्रिया अघि बढाएको छ। बैंकले विद्यमान संस्थापक सेयरधनीलाई प्राथमिकता दिँदै आजदेखि उक्त सेयर खरिदका लागि आवेदन आह्वान गरेको हो।

बैंकका अनुसार बिक्रीमा राखिएको संस्थापक सेयर खरिद गर्न हालका संस्थापक सेयरधनीले मात्रै आवेदन दिन पाउने व्यवस्था गरिएको छ। इच्छुक सेयरधनीले सूचना प्रकाशित भएको मितिले ३५ दिनभित्र बैंकको नक्सालस्थित केन्द्रीय कार्यालयमा रहेको कम्पनी सचिवको कार्यालयमा आफूले खरिद गर्न चाहेको सेयर संख्या उल्लेख गरी लिखित निवेदन पेश गर्नुपर्नेछ।

बैंकले तोकिएको अवधिभित्र विद्यमान संस्थापक सेयरधनीबाट पर्याप्त आवेदन प्राप्त नभएमा बाँकी सेयर अन्य व्यक्ति तथा संघ–संस्थालाई बिक्री गर्ने प्रक्रिया अघि बढाइने जनाएको छ।

संस्थापक सेयरको स्वामित्व हस्तान्तरणसम्बन्धी प्रचलित व्यवस्थाअनुसार, बैंकले प्रारम्भिक चरणमा हालका संस्थापक सेयरधनीलाई नै खरिदको अवसर प्रदान गरेको हो।