आवासीय घर कर्जाको सीमा रु. ३ करोड पुग्यो

काठमाडौं । नेपाल राष्ट्र बैंकले आर्थिक वर्ष २०८२/८३ को मौद्रिक नीतिको वार्षिक समीक्षामार्फत निजी आवासीय घर निर्माण तथा खरिदका लागि प्रवाह हुने कर्जाको सीमा बढाएको छ ।

राष्ट्र बैंकका अनुसार निजी आवासीय घर निर्माण वा खरिद गर्न प्रवाह गरिने कर्जाको सीमा रुपैयाँ २ करोडबाट बढाएर रुपैयाँ ३ करोड कायम गरिएको छ ।

यससँगै कर्जा - मूल्य अनुपात समेत तोकिएको छ । पहिलो घर निर्माण वा खरिद गर्दा यस्तो कर्जा प्रवाहका लागि कर्जा - मूल्य अनुपात बढीमा ८० प्रतिशतसम्म कायम गर्न सकिने व्यवस्था मिलाइएको छ भने अन्यको हकमा भने यो अनुपात बढीमा ७० प्रतिशतसम्म कायम गर्न सकिनेछ ।

वित्तीय प्रणालीमा अधिक तरलता रहेको र कर्जा प्रवाह अपेक्षित रूपमा वृद्धि हुन नसकेको अवस्थामा आवास क्षेत्रको माग बढाई कर्जा विस्तारलाई प्रोत्साहन गर्ने उद्देश्यले राष्ट्र बैंकले यो सीमा बढाएको हो ।