असारका लागि वाणिज्य बैंकहरूको नयाँ ब्याजदर सार्वजनिक, कुन बैंकको ब्याजदर कति?

नेपालका सबै २० वटा वाणिज्य बैंकहरूले असार महिनाका लागि आफ्नो नयाँ ब्याजदर तालिका सार्वजनिक गरेका छन्। उपलब्ध तथ्याङ्क अनुसार, जेठको तुलनामा असारमा निक्षेपको औसत ब्याजदरमा सामान्य गिरावट आएको छ, जसले गर्दा बचतकर्ताले पाउने प्रतिफल घट्ने क्रम जारी छ।

व्यक्तिगत निक्षेपतर्फको औसत अधिकतम ब्याजदर जेठको ४.३४३ प्रतिशतबाट घटेर असारमा ४.२६५५ प्रतिशत कायम भएको छ। त्यस्तै, संस्थागत निक्षेपको औसत दर पनि जेठको ३.२०४ प्रतिशतबाट केही घटेर असारमा ३.१८ प्रतिशतमा झरेको छ।

सबैभन्दा बढी कटौती कुन बैंकको

समीक्षा अवधिमा लक्ष्मी सनराइज बैंक र एनआईसी एशिया बैंकले व्यक्तिगततर्फको ब्याजदरमा सबैभन्दा बढी ०.५ प्रतिशतविन्दुले कटौती गरेका छन्। यसैगरी हिमालयन बैंकले ०.२५ प्रतिशतविन्दु र प्राइम कमर्सियल बैंकले ०.१५ प्रतिशतविन्दुले दर घटाएका छन्। एनएमबि, स्ट्याण्डर्ड चार्टर्ड र कुमारी बैंकले व्यक्तिगत निक्षेपको अधिकतम ब्याजदर ०.०५ प्रतिशतविन्दुले घटाएका छन्।

ब्याजदर यथावत् राख्ने बैंक

राष्ट्रिय वाणिज्य बैंक, नबिल बैंक, प्रभु बैंक र सानिमा बैंक लगायत जम्मा १४ वटा बैंकले जेठ महिनाकै ब्याजदरलाई निरन्तरता दिएका छन्, जसले अधिकांश बैंकले अहिलेलाई दर थप घटाउने ठाउँ वा आवश्यकता नदेखेको सङ्केत गर्छ।