पीडितलाई क्षतिपूर्ति, घाइतेलाई आजीवन निःशुल्क उपचार: व्यापक राहत प्याकेजको सिफारिस

काठमाडौँ । राष्ट्रिय मानव अधिकार आयोगले गत भदौ २३ र २४  प्रदर्शनमा मृत्यु भएका, घाइते भएका र भौतिक क्षति व्यहोरेकाहरूका लागि व्यापक राहत प्याकेजको सिफारिस गरेको छ।

भदौ २४ गतेको आगजनीमा परी मृत्यु भएका २१ जनामध्ये पहिचान भएका ९ जना र पहिचान भएपछि बाँकी १२ जनाका हकवाला परिवारलाई Gen Z प्रदर्शनमा मारिएका अन्य मृतकसरह राहत/क्षतिपूर्ति उपलब्ध गराउन आयोगले सिफारिस गरेको छ।

घाइते भई जीवनभर वा लामो समयसम्म उपचार/औषधि सेवन गर्नुपर्नेहरूको बाँकी सम्पूर्ण उपचार र औषधि निःशुल्क गराउने व्यवस्था मिलाउन सिफारिस गरिएको छ।

जीविकोपार्जनको स्रोत नभएका मृतकको आश्रित परिवारको कम्तीमा एक सदस्यलाई रोजगारी वा स्वरोजगारको व्यवस्था मिलाउन र अपाङ्गता भएका घाइतेलाई आजीवन सहयोगी वा सहयोगी भत्तासहित आर्थिक स्रोत सुनिश्चित गर्न पनि आयोगले सरकारलाई सिफारिस गरेको छ।

साथै, सार्वजनिक र निजी क्षेत्रमा भएको क्षतिको यथार्थ मूल्यांकन गरी उचित क्षतिपूर्ति दिलाउन र सुनसरीको इटहरीमा २ जना तथा झापामा ३ जना सुरक्षाकर्मीको गोली लागी मृत्यु भएको घटनाको सूक्ष्म अनुसन्धान गरी दोषीलाई कारबाही गर्न सिफारिस गरिएको छ।