विद्युत बिक्रीको आम्दानीसँगै माउन्टेन इनर्जीको नाफा पनि १३.४४ प्रतिशतले बढ्यो, EPS किन घट्यो?

माउन्टेन इनर्जी नेपाल लिमिटेड (MEN) ले आर्थिक वर्ष २०८२/८३ को तेस्रो त्रैमासको वित्तीय विवरण सार्वजनिक गरेको छ। चैत्र मसान्तसम्मको नौ महिनामा कम्पनीले रु. ५२ करोड ७६ लाख खुद नाफा आर्जन गरेको छ। यो रकम अघिल्लो आर्थिक वर्षको सोही अवधिमा कमाएको रु. ४६ करोड ५१ लाखभन्दा १३.४४ प्रतिशतले बढी हो।

कम्पनीको आम्दानी पनि उत्साहजनक छ। नौ महिनामा कुल आम्दानी रु. १०७ करोड ९७ लाख पुगेको छ, जुन गत वर्षको तुलनामा १७ प्रतिशतले बढी हो। बिजुली बिक्रीबाट प्राप्त यो आम्दानीमा ताडी खोला हाइड्रोपावरले रु. ११ करोड ९१ लाख र मिस्त्री खोला हाइड्रोपावरले रु. ९६ करोड ७ लाख योगदान गरेका छन्। दुई परियोजना मिलाएर कम्पनीको कुल जडान क्षमता ४७ मेगावाट छ।

नाफा बढ्यो, तर EPS घट्यो

सबै सूचक भने सकारात्मक छैनन्। कम्पनीको नाफा बढे पनि प्रति शेयर आम्दानी (EPS) भने घटेको छ। चालू वर्षको त्रैमासिक EPS रु. १६.८९ कायम भएको छ। गत वर्षको सोही त्रैमासमा यो रु. १७.८७ थियो। यो ५.४८ प्रतिशतको गिरावट हो।

यसको मुख्य कारण कम्पनीले गत वर्ष बोनस शेयर वितरण गरेर शेयर पुँजी बढाएको हो। शेयर पुँजी रु. २६० करोड २७ लाखबाट बढेर अहिले रु. ३१२ करोड ३३ लाख पुगेको छ, जुन करिब २० प्रतिशतले बढी हो। शेयर संख्या बढेपछि प्रति शेयर बाँडिने नाफाको हिस्सा स्वाभाविक रूपमा घट्यो।

यही कारण प्रति शेयर नेटवर्थ पनि गत वर्षको रु. १४५.८७ बाट घटेर रु. १४२.२४ मा झरेको छ। तर पनि कम्पनीको चालू अनुपात (Current Ratio) २.५१ रहेकाले छोटो अवधिको दायित्व चुक्ता गर्ने क्षमता बलियो छ।

वित्तीय खर्च घट्यो, ऋण भुक्तानी अघि बढ्यो

व्यवस्थापन पक्षको खुशीको खबर भनेको कम्पनीको वित्तीय खर्च घट्नु हो। नौ महिनामा वित्तीय खर्च रु. १६ करोड १५ लाख मा सीमित भएको छ। गत वर्षको रु. १८ करोड १८ लाखभन्दा यो ११.१५ प्रतिशतले कम हो। यो भनेको कम्पनीले दीर्घकालीन ऋण नियमित भुक्तानी गर्दै लगेको प्रमाण हो।

दीर्घकालीन कर्जा अघिल्लो वर्षको रु. २७७ करोड ५९ लाख बाट घटेर अहिले रु. २३२ करोड ६० लाख मा झरेको छ। अर्कोतर्फ कम्पनीको वित्तीय आम्दानीमा ठूलो उछाल देखिएको छ। गत वर्षको रु. १४ लाख ४७ हजार बाट यो वर्ष रु. २ करोड ९० लाख पुगेको छ। यो वृद्धि कोषको सबल व्यवस्थापन र छोटो अवधिको लगानीबाट प्राप्त ब्याज आम्दानीका कारण भएको हो।

समग्रमा हेर्दा करपूर्व नाफा रु. ५४ करोड १९ लाख पुगेको छ, जुन गत वर्षको रु. ४७ करोड ९ लाखभन्दा १५.०७ प्रतिशतले बढी हो। सकल नाफा (Gross Profit) रु. ७२ करोड २७ लाख र सञ्चालन नाफा रु. ६८ करोड ६४ लाख रहेको छ।

NEA विरुद्धको दाबी अझै कायमै

मिस्त्री खोला परियोजनासँग सम्बन्धित विद्युत खरिद सम्झौताको दफा १२ र दफा ३८.१८ अन्तर्गत नेपाल विद्युत प्राधिकरण (NEA) सँगको विवादमा कम्पनीको पक्षमा फैसला आइसकेको छ। नेपाल मध्यस्थता परिषद् (NEPCA) ले २०८० कार्तिकमा MEN को पक्षमा फैसला सुनाएको थियो। प्राधिकरणले उच्च अदालत पाटनमा गरेको पुनरावेदन पनि २०८१ बैशाख २२ मा कम्पनीकै पक्षमा सदर भएको थियो।

अदालतको आदेश अनुसार प्राधिकरणले श्रावण २०७९ सम्मको दाबीवापत रु. २९ करोड ३० लाख ९० हजार रकम अदालतमा जम्मा गरिसकेको छ। तर भदौ २०७९ देखि पुस २०८२ सम्मको अवधिको थप दाबी रु. ८५ करोड २५ लाख (ब्याज बाहेक) अझै बाँकी छ। यसका लागि कम्पनीले २०८२ भदौ २९ गते ललितपुर जिल्ला अदालतमा पूर्ण कार्यान्वयन माग गर्दै निवेदन दर्ता गरेको छ। यो रकम प्राप्त भएमा कम्पनीको आगामी त्रैमासको नाफा थप उच्च हुने सम्भावना छ।

शेयर मूल्य र कर सहुलियत

तेस्रो त्रैमासमा माउन्टेन इनर्जीको शेयर मूल्य उच्चतम रु. ६५५ सम्म पुगेको थियो। न्यूनतम मूल्य रु. ५६५ कायम भएको देखिन्छ। त्रैमास अन्त्यमा बजार समापन मूल्य रु. ५९९ मा रह्यो। ४७ कारोबार दिन मा कुल ३८ लाख ६० हजार २८ कित्ता शेयर हस्तान्तरण भयो र कारोबार रकम (टर्नओभर) रु. २ अर्ब ३२ करोड पुग्यो। चालू पी/ई अनुपात ३५.४६ रहेको छ, जुन गत वर्षको ३७.७० भन्दा सामान्य कम छ।

कर सहुलियतका हिसाबले मिस्त्री खोला आयोजना २०८८ असार ०२ सम्म पूर्ण कर छुटको अवधि मा छ। त्यसपछिको पाँच वर्ष ५० प्रतिशत कर सहुलियत प्राप्त गर्ने व्यवस्था छ। ताडी खोला को शत प्रतिशत कर छुट अवधि सकिएको र अहिले १२.५ प्रतिशतको रियायती दर मा कर बुझाइरहेको छ।