काठमाडौं । नेपालको अग्रणी मदिरा उत्पादक कम्पनी हिमालयन डिष्टिलरी लिमिटेड (HDL) ले चालू आर्थिक वर्ष २०८२/८३ को तेस्रो त्रैमास (चैत मसान्तसम्म) को अपरिष्कृत वित्तीय विवरण सार्वजनिक गरेको छ। प्रतिवेदनअनुसार गत वर्षको सोही अवधिको तुलनामा कम्पनीको बिक्री आम्दानी र खुद नाफा दुवैमा बलियो वृद्धि देखिएको छ।

कम्पनीले Q3 सम्म रु. ३ अर्ब ९ करोड १४ लाख खुद बिक्री आम्दानी गरेको छ — गत वर्षको सोही अवधिको रु. २ अर्ब ७८ करोड ५० लाखको तुलनामा ११% वृद्धि। बिक्रीमा आएको यो वृद्धिसँगै कम्पनीको खुद नाफा रु. ८५ करोड १३ लाख पुगेको छ — गत वर्षको तुलनामा १५.१६% बढी।

सञ्चालन खर्च नियन्त्रणमा रहँदा कम्पनीको सञ्चालन नाफा रु. १ अर्ब १६ करोड पुगेको छ। पूँजी संरचनाका हिसाबले कम्पनीको चुक्ता पूँजी रु. २ अर्ब ६७ करोड रहेकोमा जगेडा कोष रु. १ अर्ब १७ करोड पुग्नुले लाभांश वितरण गर्ने क्षमता बलियो रहेको देखिन्छ। बजार मूल्याङ्कनका हिसाबले गत साताको अन्तिम कारोबार मूल्यका आधारमा कम्पनीको P/E अनुपात ३७.२३ गुणा रहेको छ ।

प्रतिवेदनमा कम्पनीले राष्ट्रिय अर्थतन्त्रको सुस्तता र उपभोक्ताको क्रयशक्तिमा परिवर्तनका बाबजुद बजार हिस्सा जोगाउन सफल भएको उल्लेख गरेको छ। तर कच्चा पदार्थको बढ्दो मूल्य, ऊर्जा संकट र मदिराजन्य उत्पादनमा लाग्ने उच्च अन्तःशुल्क मुख्य चुनौती रहेको कम्पनीले स्वीकार गरेको छ। आगामी रणनीतिमा कम्पनीले ‘DDGS’ प्लान्टजस्ता नयाँ प्रविधिको प्रयोग र उत्पादन विविधीकरणमा जोड दिने उल्लेख गरेको छ।

Keywords