याम्बालिङ्ग हाइड्रोपावरको आईपीओ आजदेखि खुला, कति दिने आवेदन?

सिन्धुपाल्चोकमा रहेको याम्बालिङ्ग हाइड्रोपावर लिमिटेडले आज वैशाख १६ गतेदेखि सर्वसाधारण लगानीकर्तालाई लक्षित गरी आफ्नो प्राथमिक सेयर निष्काशन (आईपीओ) खुला गरेको छ। कम्पनीले यस चरणमा कुल १७ लाख ४३ हजार कित्ता सेयर सार्वजनिक बिक्रीमा ल्याएको हो।

तोकिएको समयतालिकाअनुसार लगानीकर्ताले वैशाख २२ गतेसम्म आवेदन दर्ता गराउन सक्नेछन्। एक लगानीकर्ताले न्यूनतम १० कित्तादेखि अधिकतम २१ हजार कित्तासम्म आवेदन दिन पाउने व्यवस्था गरिएको छ। यदि उक्त अवधिभित्र पूर्ण कित्ता बिक्री हुन सकेन भने आवेदनको म्याद थप हुने सम्भावना रहन्छ।

निष्काशन तथा बिक्री प्रबन्धकको जिम्मेवारी मुक्तिनाथ क्यापिटल लिमिटेडले लिएको छ। आवेदकहरूले आस्बा (ASBA) प्रणालीमार्फत बैंक तथा वित्तीय संस्था वा अनलाइन प्लेटफर्मबाट आवेदन गर्न सक्नेछन्। नेपाल धितोपत्र बोर्ड (सेबोन) ले कम्पनीको आईपीओ निष्काशनलाई २०८२ साल फागुन १७ गते स्वीकृति प्रदान गरिसकेको थियो।

याम्बालिङ्गले सिन्धुपाल्चोक जिल्लामा ७.२७१ मेगावाट क्षमताको याम्बालिङ्ग खोला जलविद्युत आयोजना निर्माण सम्पन्न गरी २०८० साल फागुन ८ गतेदेखि व्यावसायिक रूपमा विद्युत् उत्पादन सुरु गरिसकेको छ। यो रन-अफ-रिभर प्रकारको आयोजनाले राष्ट्रिय प्रसारण लाइनमार्फत विद्युत् आपूर्ति गरिरहेको छ।