एभरेष्ट बैंकको खुद नाफा घट्यो, इपीएस ३२.३५ रुपैयाँ

नेप्सेमा सूचीकृत वाणिज्य बैंक एभरेष्ट बैंक लिमिटेड ले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण प्रकाशित गरेको छ। प्रकाशित विवरणअनुसार बैंकको खुद नाफा ३.७१ प्रतिशतले घटेर ३ अर्ब ३२ करोड ९३ लाख रुपैयाँमा सीमित भएको छ। अघिल्लो वर्षको सोही अवधिमा कम्पनीले ३ अर्ब ४५ करोड ७६ लाख रुपैयाँ खुद नाफा कमाएको थियो। इम्पेयरमेन्ट चार्जमा उल्लेख्य वृद्धि भएका कारण नाफामा घट्ने दबाब परेको हो।

आम्दानीको पाटोबाट हेर्दा बैंकको खुद ब्याज आम्दानी १.३३ प्रतिशतले बढेर ६ अर्ब ८३ करोड ३५ लाख रुपैयाँ पुगेको छ भने सञ्चालन आम्दानी ९.२२ प्रतिशतले बढेर ८ अर्ब ९३ करोड १० लाख रुपैयाँ कायम भएको छ। यता इम्पेयरमेन्ट चार्ज २७ करोड २९ लाख रुपैयाँबाट बढेर ७७ करोड ७४ लाख रुपैयाँ पुगेको छ। यसैको असरस्वरूप सञ्चालन मुनाफा ३.५३ प्रतिशतले घटेर ४ अर्ब ९० करोड ३७ लाख रुपैयाँमा सीमित भएको छ।

परिसम्पत्ति गुणस्तरतर्फ बैंकले अझै थप सुधार देखाएको छ। खराब कर्जा (एनपीएल) अनुपात ०.०३ प्रतिशतबिन्दुले घटेर ०.६१ प्रतिशतमा सीमित भएको छ, जुन वाणिज्य बैंकहरूका बीच निकै कम मानिन्छ।

बैंकको आकारतर्फ ठूलो विस्तार भएको छ। समीक्षा अवधिमा बैंकले ३ खर्ब २ अर्ब ४३ करोड रुपैयाँ निक्षेप संकलन गरी २ खर्ब ५० अर्ब ८७ करोड रुपैयाँ कर्जा प्रवाह गरेको छ।

लाभांश क्षमतातर्फ बैंकको वितरणयोग्य मुनाफा ४ अर्ब ४ करोड ८६ लाख रुपैयाँ पुगेको छ भने वितरणयोग्य प्रतिसेयर आम्दानी ३९ रुपैयाँ ३४ पैसा रहेको छ।

पुँजी संरचनाअन्तर्गत बैंकको चुक्ता पुँजी १३ अर्ब ७२ करोड १४ लाख रुपैयाँ पुगेको छ भने जगेडा कोषमा १९ अर्ब ७९ करोड ५८ लाख रुपैयाँ सञ्चित रहेको छ।

प्रति सेयर सूचकहरूमा बैंकको प्रतिसेयर आम्दानी ३ रुपैयाँ २६ पैसाले घटेर ३२ रुपैयाँ ३५ पैसामा सीमित भएको छ। यस्तै प्रतिसेयर नेटवर्थ २४४ रुपैयाँ २७ पैसा कायम भएको छ।