हिम स्टार उर्जाको सेयर डिम्याटमा आउन अझै दुई दिन लाग्ने, कारोबार सुरु हुन कति समय लाग्ला?

काठमाडौं — एक महिना अघि आईपीओ बाँडफाँड सम्पन्न भए पनि हिम स्टार उर्जा कम्पनी लिमिटेडको सेयर अझैसम्म लगानीकर्ताको डिम्याट खातामा देखिएको छैन। सामान्यतः बाँडफाँडपछि १०–१५ दिनभित्र सेयर खातामा देखिनुपर्ने भए पनि यसपटक प्रक्रिया लम्बिएको छ, जसले लगानीकर्तामा अन्योलता सिर्जना गरेको छ।

ढिलाइको कारण

सेयर रजिस्ट्रार एनआईसी एशिया क्यापिटलका अनुसार सेयर वितरण प्रक्रिया ढिलो हुनुमा CDSC (केन्द्रीय निक्षेप प्रणाली) बाटै ढिलाइ भएको हो। साथै, ISIN को विवादसमेत एक कारण भएको जानकारी दिइएको छ। यद्यपि, अब प्रक्रिया अन्तिम चरणमा पुगेको र आगामी दुई दिनभित्र सेयर लगानीकर्ताको खातामा देखिने क्यापिटलले जनाएको छ।

कारोबार सुरु हुने समय

एनआईसी एशिया क्यापिटलले सेयर CDSC बाट खातामा देखिएपछि नेप्सेमा फाइल बुझाउने तयारी गरिरहेको छ। सबै प्रक्रिया सहज रूपमा सम्पन्न भएमा एक हप्ताभित्र नेप्सेमा कारोबार सुरु हुने अपेक्षा गरिएको छ।

ओपनिङ रेन्ज कति?

नेप्सेमा कुनै पनि कम्पनीको सुरुवाती कारोबार मूल्य (Opening Range) सो कम्पनीको नेटवर्थ वा बुक भ्यालुको आधारमा निर्धारण गरिन्छ। हिम स्टार उर्जाको बुक भ्यालु रु ९९.१७ रहेको छ। त्यसको तीन गुणासम्मको रेन्ज निर्धारण गरिने भएकाले यसको ओपनिङ रेन्ज रु ९९.१७ देखि रु २९७.५१ सम्म रहनेछ।