प्रभु महालक्ष्मी लाइफको लाभांश घोषणा

काठमाडौं, १९ बैशाख । प्रभु महालक्ष्मी लाइफ इन्स्योरेन्सले आर्थिक वर्ष २०८०/८१ का लागि सेयरधनीहरूलाई आकर्षक लाभांश प्रस्ताव गरेको छ। कम्पनीको सञ्चालक समितिको वैशाख १७ गते बसेको बैठकले वितरणयोग्य नाफाबाट हाल कायम रहेको चुक्तापूँजीको आधारमा कुल ८.४२१ प्रतिशत लाभांश दिने निर्णय गरेको हो। सो लाभांशमा ८ प्रतिशत बोनस सेयर र कर प्रयोजनका लागि ०.४२१ प्रतिशत नगद लाभांश समावेश छ।

कम्पनीले प्रस्ताव गरेको लाभांश नेपाल बीमा प्राधिकरणबाट स्वीकृत भएपछि मात्र लागू हुनेछ। त्यसपछि कम्पनीको आगामी वार्षिक साधारण सभाबाट समेत अनुमोदन प्राप्त गरी उक्त लाभांश सेयरधनीहरूलाई वितरण गरिनेछ।

गत वर्ष अर्थात् आर्थिक वर्ष २०७९/८० मा कम्पनीले १०.५३ प्रतिशत लाभांश वितरण गरेको थियो, जसको तुलनामा यस वर्षको लाभांश केही घटेको देखिन्छ। तर पनि कम्पनीले निरन्तर रूपमा लाभांश वितरण गर्दै आएको तथ्यले यसको वित्तीय स्थितिमा स्थायित्व देखाउँछ।