चिनियाँ एआई कम्पनी डीपसिकको क्रान्ति: अमेरिकी प्रविधि कम्पनीहरू संकटमा

चिनियाँ एआइ स्टार्टअप डीपसिकले हालै एक उन्नत खुला स्रोत लार्ज ल्याङ्ग्वेज मोडेल सार्वजनिक गरेको छ, जसले विश्वभर ठूलो प्रभाव पारेको छ। तुलनात्मक रूपमा निकै कम लागत र स्रोत प्रयोग गरेर विकसित गरिएको यस मोडेलले च्याट जीपीटी जस्ता प्रतिस्पर्धीलाई टक्कर दिने क्षमता देखाएको छ। डीपसिकको प्रविधिले अमेरिकाको ठूला प्रविधि कम्पनीहरुमा ठूलो झट्का पुर्‍याएको छ। एनभिडिया, माइक्रोसफ्ट, र टेस्ला जस्ता कम्पनीका सेयर मूल्यमा भारी गिरावट आएको छ। एनभिडियाको सेयर मूल्य मात्र १७% ले घटेको छ, जसले गर्दा अमेरिकी प्रविधि क्षेत्रमा करिब १ ट्रिलियन डलर बराबरको बजार मूल्य गुमेको छ।  

यस घटनाले अमेरिकी सेयर बजारमा पनि नकारात्मक असर गरेको छ। एस एन्ड पी ५०० र नास्ड्याक कम्पोजिट जस्ता प्रमुख सूचकांकहरूमा गिरावट देखिएको छ। यस घटनाले अमेरिकी अधिकारीहरूलाई आफ्ना एआइ संरचनामा थप लगानी गर्न र प्रतिस्पर्धी क्षमतालाई सुदृढ पार्न प्रेरित गरेको छ।  

चिनियाँ कम्पनीको यस्तो उन्नति पश्चिमा देशहरूका लागि ठूलो चुनौती बनेको छ। चीनले एआईको क्षेत्रमा ठूलै फड्को मारेपछि अमेरिका लगायत पश्चिमा देशहरू झस्किएका छन्। उनीहरूले आफ्ना नवप्रवर्तनमा ध्यान केन्द्रित गर्दै प्रतिस्पर्धी क्षमतालाई अघि बढाउनुपर्ने देखिएको छ।  

यस घटनाले एआइ प्रविधिमा विश्वव्यापी प्रतिस्पर्धा चर्को हुने संकेत गरेको छ।