कात्तिकमा ६५ हजार ८०८ जनाले लिए श्रम स्वीकृति, नयाँ कामदारमा रोमानियाले साउदीलाई तीन गुणाले उछिन्यो

युरोपका ३५ मुलुकका लागि ७ हजार ९४० जनाले श्रम स्वीकृति लिए, तर खाडी अझै ६६ प्रतिशत हिस्सासहित प्रमुख गन्तव्य छ ।

Artha Kendra Artha Kendra
आइतबार, ६ मंसिर २०८३, ९:२३ AM
—
फन्ट
कात्तिकमा ६५ हजार ८०८ जनाले लिए श्रम स्वीकृति, नयाँ कामदारमा रोमानियाले साउदीलाई तीन गुणाले उछिन्यो

काठमाडौं । वैदेशिक रोजगारीमा जाने नेपालीको गन्तव्यमा युरोपको हिस्सा बढ्दै गएको छ । वैदेशिक रोजगार विभागको कात्तिक २०८३ को तथ्याङ्कअनुसार पहिलो पटक श्रम स्वीकृति लिएर रोमानिया जाने नेपाली १ हजार ६५४ जना छन् भने साउदी अरब जाने नयाँ कामदार ५५२ जना मात्र छन् ।

यसअनुसार नयाँ कामदारको गन्तव्यमा रोमानियाले साउदी अरबलाई करिब तीन गुणाले उछिनेको छ । विभागले कात्तिक १ देखि ३० गतेसम्म (अक्टोबर १८ देखि नोभेम्बर १६ सम्म) जारी गरेको अन्तिम श्रम स्वीकृतिको देशगत विवरण मंसिर २ गते सार्वजनिक गरेको हो ।

कात्तिकमा ६५ हजार ८०८ श्रम स्वीकृति

कात्तिक महिनामा कुल ६५ हजार ८०८ जनाले वैदेशिक रोजगारीका लागि श्रम स्वीकृति लिएका छन् । तीमध्ये ५६ हजार २९५ पुरुष र ९ हजार ५१३ महिला छन् ।

कुल श्रम स्वीकृतिमध्ये ३९ हजार १४८ जना पुनः श्रम स्वीकृति लिएर पुरानै गन्तव्यमा फर्किएका कामदार हुन् । पहिलो पटक श्रम स्वीकृति लिनेको सङ्ख्या २६ हजार ६६० छ । यसमा म्यानपावर कम्पनीमार्फत जाने १६ हजार ६४३, व्यक्तिगत रूपमा नयाँ श्रम स्वीकृति लिने ९ हजार ४७०, सरकारी स्तरको सम्झौता (जीटुजी) अन्तर्गत जाने ५२५ र वैधानिकीकरण गरिएका २२ जना छन् ।

साउदी जानेमध्ये ९२ प्रतिशत पुराना कामदार

कात्तिकमा साउदी अरबका लागि कुल ६ हजार ९८९ जनाले श्रम स्वीकृति लिएका छन् । तर तीमध्ये ६ हजार ४३७ जना अर्थात् करिब ९२ प्रतिशत पुनः श्रम स्वीकृति लिएर फर्कने पुराना कामदार हुन् । पहिलो पटक साउदी जाने ५५२ जना मात्र छन् ।

रोमानियाका लागि भने कुल २ हजार ५८७ जनाले श्रम स्वीकृति लिएका छन् । यसमध्ये १ हजार ६५४ जना पहिलो पटक जाने कामदार हुन् भने ९३३ जना पुनः श्रम स्वीकृति लिएर गएका हुन् । रोमानिया जाने सबै नयाँ कामदारले व्यक्तिगत रूपमा श्रम स्वीकृति लिएका छन् ।

युरोपका ३५ मुलुकका लागि ७ हजार ९४०

कात्तिकमा युरोपका ३५ मुलुकका लागि कुल ७ हजार ९४० जनाले श्रम स्वीकृति लिएका छन्, जसमध्ये ४ हजार ४४० जना पहिलो पटक जाने कामदार हुन् ।

रोमानियापछि क्रोएसियाका लागि १ हजार ३९, माल्टाका लागि ७९३, साइप्रसका लागि ७०९, बुल्गेरियाका लागि ५१७, सर्बियाका लागि ४५४, पोल्यान्डका लागि ३१३, बेलायतका लागि २८० र पोर्चुगलका लागि २४८ जनाले श्रम स्वीकृति लिएका छन् ।

युरोप र एसियाको सिमानामा रहेको टर्कीका लागि छुट्टै १ हजार १३७ जनाले श्रम स्वीकृति लिएका छन्, जसमध्ये १ हजार ४४ जना नयाँ कामदार हुन् ।

खाडी अझै प्रमुख गन्तव्य

युरोपतर्फको आकर्षण बढे पनि कुल सङ्ख्यामा खाडी मुलुक नै अगाडि छन् । कात्तिकमा संयुक्त अरब इमिरेट्स (यूएई), कतार, साउदी अरब, कुवेत, ओमान र बहराइन गरी खाडीका ६ मुलुकका लागि ४३ हजार २७५ जनाले श्रम स्वीकृति लिएका छन्, जुन कुलको करिब ६६ प्रतिशत हो ।

एकल मुलुकका रूपमा यूएई सबैभन्दा ठूलो गन्तव्य बनेको छ । कात्तिकमा यूएईका लागि २० हजार ३२९ जनाले श्रम स्वीकृति लिएका छन्, जसमध्ये ९ हजार ९२४ जना नयाँ कामदार हुन् । त्यसपछि कतार (९ हजार ५३८), मलेसिया (८ हजार ७६८), साउदी अरब (६ हजार ९८९) र कुवेत (४ हजार ५६६) छन् ।

पूर्वी एसियातर्फ जापानका लागि १ हजार ८२५ र दक्षिण कोरियाका लागि ७७५ जनाले श्रम स्वीकृति लिएका छन् ।

यो पोस्ट पढेपछि तपाईलाई कस्तो लाग्यो?

सेयर गर्नुहोस्

Comments

0 comments · join the conversation

No comments yet

Be the first to share your thoughts.