जेलेन्स्की र ट्रम्पबीच न्यूयोर्कमा भेटवार्ता हुने

काठमाडौं । युक्रेनका राष्ट्रपति भोलोदिमिर जेलेन्स्की र अमेरिकी राष्ट्रपति डोनाल्ड ट्रम्पबीच आगामी साता न्यूयोर्कमा भेटवार्ता हुने भएको छ । संयुक्त राष्ट्रसंघको महासभाको वार्षिक अधिवेशनमा सहभागी हुन दुवै नेता न्यूयोर्क पुग्ने क्रममा भेटवार्ता तय भएको जेलेन्स्कीले बताएका छन् ।

जेलेन्स्कीले ट्रम्पसँगको कुराकानीलाई महत्वपूर्ण बताउँदै न्यूयोर्कमा हुने भेटवार्ताले रुस–युक्रेन युद्ध अन्त्य गर्ने प्रयासमा नयाँ बाटो खोल्न सक्ने बताएका छन् । उनका अनुसार शान्ति प्रक्रिया युक्रेनको पहिलो प्राथमिकता भएकाले युद्धको तनाव घटाउने उपाय, सुरक्षा, ऊर्जा, खाद्य सुरक्षा र सर्वसाधारणको सुरक्षाका विषयमा छलफल हुनेछ ।

भेटवार्ताको तयारीकै क्रममा ट्रम्पका विशेष दूत स्टिभ विट्कफ र जारेड कुस्नरले यसै महिना युक्रेनको भ्रमण गरेका थिए । अमेरिकी टोलीसँग मिलेर काम गरिरहेको र शान्ति स्थापनाका लागि गम्भीर कदम चाल्न तयार रहेको जेलेन्स्कीले बताएका छन् ।

रुस र युक्रेनबीच सन् २०२२ देखि युद्ध जारी छ । युद्ध अन्त्य गर्ने प्रयासमा मुख्य विवादित विषयमध्ये रुसले कब्जा गरेका युक्रेनी भूभाग र त्यसको भविष्य रहेको छ । युक्रेनले आफ्नो भूभाग छाड्ने विषय अस्वीकार गर्दै आएको छ भने दुवै पक्षबीच युद्धविराम र शान्ति सम्झौताका लागि अमेरिकी मध्यस्थतामा प्रयास जारी छन् ।