बैंक तथा वित्तीय संस्थाले दोस्रो बजारमा गरेको शेयर लगानीको न्यूनतम होल्डिङ अवधि ४५ दिन बनाउने तयारी

काठमाडौं — सरकारले बैंक तथा वित्तीय संस्थाले दोस्रो बजारमा गरेको शेयर लगानीको न्यूनतम होल्डिङ अवधि ४५ दिन बनाउने तयारी गरेको छ। अर्थ मन्त्रालयको ‘पूँजी बजार सुदृढीकरण तथा पुनरुत्थान कार्ययोजना, २०८३’ मा सट्टेबाजी जोखिम न्यूनीकरण हुने गरी यस्तो व्यवस्था मिलाउन नेपाल राष्ट्र बैंकलाई जिम्मेवारी दिइएको छ।

प्रस्तावित व्यवस्था कार्यान्वयन भएपछि बैंक तथा वित्तीय संस्थाले शेयर खरिद गरेको कम्तीमा ४५ दिनपछि बिक्री गर्न सक्नेछन्। सम्बन्धित संस्थाको सञ्चालक समितिले सट्टेबाजी जोखिम नियन्त्रण गर्ने गरी लगानी नीति बनाउनुपर्नेछ। आवश्यकता र जोखिम मूल्यांकनका आधारमा सञ्चालक समितिले ४५ दिनभन्दा लामो होल्डिङ अवधि पनि तोक्न सक्नेछ।

होल्डिङ अवधि छोटिँदा बैंक तथा वित्तीय संस्थाले बजारको अवस्था हेरेर आफ्नो शेयर लगानी व्यवस्थापन गर्न थप लचकता पाउनेछन्। जोखिम बढेको अवस्थामा छिटो शेयर बेच्न, नाफा वा नोक्सानी समयमै बुक गर्न तथा लगानी पोर्टफोलियो पुनर्सन्तुलन गर्न सजिलो हुनेछ। यसले दोस्रो बजारमा संस्थागत कारोबार र तरलता बढाउन सहयोग पुग्ने अपेक्षा गरिएको छ।

तर बैंक तथा वित्तीय संस्थाको कारोबार धेरै सक्रिय हुँदा बजारको उतारचढाव पनि बढ्न सक्ने जोखिम छ। धेरै संस्थाले एकै समयमा शेयर खरिद वा बिक्री गरे मूल्यमा ठूलो प्रभाव पर्न सक्छ। निक्षेपकर्ताको रकमसमेत प्रयोग हुने भएकाले सञ्चालक समितिको जोखिम व्यवस्थापन, लगानी सीमा र राष्ट्र बैंकको अनुगमन महत्वपूर्ण हुनेछ।