प्रहरी महानिरीक्षक कार्कीलाई बर्खास्त गर्न सांसद खगेन्द्र सुनारको माग

काठमाडौँ । राष्ट्रिय स्वतन्त्र पार्टी (रास्वपा) का सांसद खगेन्द्र सुनारले नेपाल प्रहरीका महानिरीक्षक दानबहादुर कार्कीलाई बर्खास्त गर्न माग गरेका छन् ।

शुक्रबार प्रतिनिधि सभाको बैठकमा बोल्दै सांसद सुनारले महानिरीक्षक कार्कीविरुद्ध अख्तियार र सार्वजनिक लेखा समितिमा भ्रष्टाचारको उजुरी परेको भन्दै सरकारले किन बचाएको छ भन्दै प्रश्न गरेका हुन् ।

उनले भनेका छन्– ‘सामान्य आरोपको भरमा तीन जना मन्त्री बर्खास्तमा पर्नुभएको छ । तर करोडौँ–करोडौँ भ्रष्टाचार गरेको आरोप अहिलेका नेपाल प्रहरीका महानिरीक्षक दानबहादुर कार्कीलगायत र उनकी श्रीमतीलगायतका ठूला अधिकारीमाथि लागेको छ । करोडौँ भ्रष्टाचार गरेको आरोपको उजुरीदेखि अख्तियारदेखि सार्वजनिक लेखा समितिमा उजुरीको चाङमाथि चाङ खापिँदै गएको छ । तल्लो दर्जाका प्रहरीहरूको जुत्ता–मोजा खाइदिएको आरोप उनलाई लागेको छ ।’

सांसद सुनारले सरकारले उनलाई बर्खास्त किन गरेको छैन भन्ने प्रश्न गर्दै भने– ‘उनीमाथि छानबिन किन भइरहेको छैन, के कारणले उनलाई बचाइराखिएको छ, यो विषयमा सरकारको ध्यानाकर्षण गराउन चाहन्छु ।’