सरकार र डा. गोविन्द केसीबीच आज वार्ता हुदै

धनगढी । शिक्षा तथा खेलकुद मन्त्रालयका सचिव चुणामणि पौडेल ले अनसनरत डा. गोविन्द केसीसँग आज औपचारिक वार्ता हुने बताएका छन्।

शनिबार धनगढी पुगेका पौडेलले उपचाररत डा. केसीलाई सेती प्रादेशिक अस्पतालमै भेटेर प्रारम्भिक छलफल गरेका थिए। त्यसक्रममा डा. केसी र उनका सहयोगीसँग अनौपचारिक संवादमार्फत धारणा बुझिएको र आइतबार उनीहरूले उठाएका मागबारे औपचारिक वार्ता हुने सचिव पौडेलले जानकारी दिएका हुन्।

उनले संवाद र सहमतिका माध्यमबाट डा. केसीले उठाएका विषयको सम्मानजनक तथा सहमतिपूर्ण समाधान खोज्ने सरकारको प्रयास रहने बताए।

वार्तामा सहभागी हुन प्रधानमन्त्रीका स्वास्थ्य सल्लाहकार डा. जे.पी. अग्रवाल र स्वास्थ्य सचिव पनि आइतबार धनगढी पुगेर डा. केसीसँग संवाद गर्ने कार्यक्रम रहेको छ।

डा. केसी गत बिहीबारदेखि पाँचबुँदे मागसहित सत्याग्रहमा बसेका छन्। उनका प्रमुख मागमा सहीद दशरथचन्द स्वास्थ्य विज्ञान विश्वविद्यालयमा तत्काल ३०० शैयाको अस्पताल सञ्चालन, चिकित्सा शिक्षाको अध्ययन तत्काल सुरु गर्नुपर्ने, तथा स्वार्थप्रेरित रूपमा गरिएको उपकुलपति र रजिस्ट्रारको नियुक्ति खारेज गर्नुपर्ने रहेका छन्।