नर्वेमाथि इङ्ग्ल्यान्डको जितमा के हो स्पाइडरक्याम विवाद ?

काठमाडौँ । फिफा विश्वकप फुटबलको क्वार्टरफाइनलमा इङ्ग्ल्यान्डले अतिरिक्त समयमा नर्वेलाई २–१ ले हराउँदै सेमिफाइनलमा स्थान बनाएको छ। तर खेलपछि इङ्ग्ल्यान्डको जितभन्दा पनि स्पाइडरक्यामसँग जोडिएको विवाद ले बढी चर्चा पायो।

नर्वेका खेलाडी र प्रशिक्षक टोलीले इङ्ग्ल्यान्डको बराबरी गोल हुनुअघि बल रंगशालामाथि जडान गरिएको स्पाइडरक्याममा ठोक्किएको दाबी गरेका छन्। उनीहरूले त्यस अवस्थामा खेल तत्काल रोक्नुपर्ने भए पनि खेल जारी राखिएकाले सोही आक्रमणबाट इङ्ग्ल्यान्डले गोल गरेको भन्दै आपत्ति जनाएका हुन्।

पहिलो हाफको इन्जुरी समयमा नर्वे १–० ले अगाडि रहेको बेला गोलरक्षक ओर्जान नाइल्यान्ड ले लामो प्रहार गरेका थिए। त्यसक्रममा बल स्पाइडरक्याममा ठोक्किएर दिशा परिवर्तन गर्दै इङ्ग्ल्यान्डका इलियट एन्डरसन सम्म पुगेको देखिएको थियो। एन्डरसनले तत्काल आक्रमण अघि बढाउँदै एन्थोनी गोर्डन लाई पास दिए। गोर्डनको उत्कृष्ट पासमा जुड बेलिङ्घम ले बल नियन्त्रण गर्दै रक्षक टोर्ब्योर्न हेगम लाई छलाएर सहज गोल गरेपछि खेल १–१ को बराबरी मा पुगेको थियो।

गोल भएपछि नर्वेका खेलाडी र प्रशिक्षकहरू रेफ्री क्लेमाँ टुर्पिन सँग पुगेका थिए। उनीहरूले बल स्पाइडरक्याममा ठोक्किएको भन्दै खेल रोक्नुपर्ने दाबी गरे। मध्यविरामका क्रममा नर्वेका मुख्य प्रशिक्षक स्टाले सोलबाक्केन पनि निकै असन्तुष्ट देखिएका थिए।

फुटबलको नियमअनुसार, खेलका क्रममा बल स्पाइडरक्यामजस्ता बाह्य वस्तुमा ठोक्किएमा रेफ्रीले खेल तत्काल रोक्नुपर्छ। त्यसपछि ‘ड्रप बल’मार्फत खेल पुनः सुरु गरिन्छ। नर्वेको आपत्ति यही नियममा आधारित थियो।

यद्यपि फिफाले भिडियो सहायक रेफ्री (VAR) टोलीले बल वास्तवमै स्पाइडरक्याममा ठोक्किएको स्पष्ट प्रमाण फेला नपारेको जनाएको छ। प्रतियोगितामा प्रयोग गरिएको सेन्सरले पनि कुनै सम्पर्क भएको अभिलेख देखाएन। त्यसैले VAR ले गोललाई वैध ठहर गर्दै रेफ्रीको निर्णय यथावत् राखेको थियो।

विवादित बराबरी गोलपछि खेलको गति इङ्ग्ल्यान्डतर्फ मोडिएको थियो। अतिरिक्त समय सुरु भएको तीन मिनेटमै मोर्गन रोजर्स को शक्तिशाली प्रहार गोलरक्षक नाइल्यान्डले पूर्ण रूपमा नियन्त्रण गर्न सकेनन्। रिबाउन्डमा सबैभन्दा पहिले पुगेका बेलिङ्घमले गोल गर्दै इङ्ग्ल्यान्डलाई २–१ को अग्रता दिलाए। यही गोल निर्णायक बन्यो।

अतिरिक्त समयमा अर्को विवाद पनि देखिएको थियो। जेड स्पेन्स लडेपछि रेफ्रीले सुरुमा इङ्ग्ल्यान्डलाई पेनाल्टी दिएका थिए। तर VAR को सुझावपछि टुर्पिनले पुनः दृश्य हेरेर निर्णय सच्याए। स्पेन्सले नै पहिले सम्पर्क सुरु गरेको निष्कर्ष निकाल्दै उनले पेनाल्टीको निर्णय रद्द गरेका थिए।