एभरेष्ट कलरको आईपीओ आजदेखि खुल्यो, कहिलेसम्म भर्न पाइने ?

एभरेष्ट कलर लिमिटेडले आज जेठ २२ गतेदेखि सर्वसाधारणका लागि प्रतिकित्ता १०० रुपैयाँ अंकित मूल्यका ६ लाख ५५ हजार ७०० कित्ता साधारण सेयर निष्काशन गर्दै आफ्नो प्रारम्भिक सार्वजनिक निष्काशन (आईपीओ) खुला गरेको हो। कम्पनी नेप्सेको उत्पादन तथा प्रशोधन उपसमूहमा सूचीकृत हुने तयारीमा छ।

आज खुलेको यो निष्काशनको दोस्रो र ठूलो चरण हो। सार्वजनिक निष्काशनका लागि छुट्याइएको ७ लाख ९० हजार कित्ता (जारी पुँजीको २६.३३%) मध्ये ७९ हजार कित्ता वैदेशिक रोजगारीमा रहेका नेपालीका लागि छुट्याइएर बैशाखमै बाँडफाँड भइसकेको थियो; बाँकी ६ लाख ५५ हजार ७०० कित्ता अहिले सर्वसाधारणले भर्न पाउनेछन्।

यसमा लगानीकर्ताले न्यूनतम १० कित्ता अर्थात् मात्र १ हजार रुपैयाँ देखि अधिकतम १० हजार कित्तासम्म आवेदन दिन सक्नेछन्। यो निष्काशनको म्याद जेठ २७ गतेसम्म तोकिएको छ। तोकिएको अवधिभित्र पूर्ण आवेदन नपरे म्याद असार ५ गतेसम्म लम्बिन सक्नेछ। निष्काशन तथा बिक्री प्रबन्धकको जिम्मेवारी मुक्तिनाथ क्यापिटल लिमिटेडले सम्हालेको छ।

कम्पनीबारे

एभरेष्ट कलर लिमिटेडले चितवनको टुँगारा–०३ मा रङ कारखाना सञ्चालन गर्दै आएको छ, जहाँ भित्री र बाहिरी इमल्सन, इनामेल, प्राइमर, एक्रिलिक डिस्टेम्पर, सिमेन्ट तथा फ्लोर कोटिङ र औद्योगिक रङ उत्पादन हुन्छ। सन् २०११ मा प्राइभेट कम्पनीका रूपमा दर्ता भएको कम्पनी सन् २०२४ को मध्यतिर पब्लिक लिमिटेडमा परिणत भएको हो भने यसको जारी पुँजी ३० करोड रुपैयाँ रहेको छ। धितोपत्र बोर्ड (सेबोन)ले निष्काशनलाई स्वीकृति दिएको छ भने केयर रेटिङ्स नेपालले कम्पनीलाई पहिलेको ‘BB-’ बाट स्तरोन्नति गर्दै ‘CARE-NP BB (Is)’ रेटिङ प्रदान गरेको छ, जसले मध्यम स्तरको जोखिम संकेत गर्छ।