प्रधानमन्त्रीको जवाफ माग्दै विपक्षीको अवरोध, प्रतिनिधि सभा १५ मिनेटका लागि स्थगित

काठमाडौँ । प्रतिनिधि सभाको बैठकमा विपक्षी दलहरुले प्रधानमन्त्री संसदमा उपस्थित भएर जवाफ दिनुपर्ने माग गर्दै अवरोध गरेपछि बैठक १५ मिनेटका लागि स्थगित भएको छ ।

मंगलबार बसेको प्रतिनिधि सभा बैठकमा शून्य समय र विशेष समय सकिएपछि विपक्षी दलहरुले प्रधानमन्त्री संसदमा आउनुपर्ने माग राख्दै नाराबाजीसहित अवरोध गरेका हुन् ।

अवरोधपछि सभामुख डीपी अर्याल ले सरकार र सत्ता पक्षसँग छलफल भएको तथा प्रधानमन्त्री सांसदहरुको प्रश्नको जवाफ दिन तयार रहेको जानकारी गराएका थिए ।

तर विपक्षी दलहरुले सभामुखको स्पष्ट रुलिङ माग गर्दै प्रधानमन्त्री संसदमा आउने समय तोक्नुपर्ने अडान राखे । उनीहरुले प्रधानमन्त्री संसदप्रति जवाफदेही हुनुपर्ने भन्दै संसदमै उपस्थित भएर प्रश्नहरुको जवाफ दिनुपर्ने माग दोहोर्‍याएका थिए ।

सभामुख अर्यालले अवरोधकै बीच बैठक अगाडि बढाउने प्रयास गरेपनि विपक्षी दलहरुको लगातार विरोध जारी रहेपछि बैठक १५ मिनेटका लागि स्थगित गरिएको हो ।