नासा एक्समा समस्या : शेयर नदेखिँदा किनबेच प्रभावित, सम्पर्क हुन नसकेको लगानीकर्ताको गुनासो

नाासा सेक्युरिटिजको अनलाइन कारोबार प्रणाली ‘नासा एक्स’ मा समस्या देखिएको भन्दै लगानीकर्ताहरूले गुनासो गर्न थालेका छन्। प्रणालीमा आफूले धारण गरेको शेयर नदेखिँदा किनबेच गर्न समस्या भएको लगानीकर्ताहरूले बताएका छन्।

एक लगानीकर्ताका अनुसार प्रणालीमा शेयर नै नदेखिएपछि आफूसँग भएको शेयर बिक्री गर्न कठिन भएको छ। साथै समस्या समाधानका लागि कम्पनीसँग सम्पर्क गर्न खोज्दा पनि सहज रूपमा सम्पर्क हुन नसकेको उनको गुनासो छ। “फोन गर्दा सम्पर्क हुँदैन, इमेल गर्दा स्वचालित रिप्लाइ मात्र आउँछ, तर समस्या समाधान भएको छैन,” उनले बताएका छन्।

पछिल्लो समय नासा सेक्युरिटिजप्रति लगानीकर्ताको असन्तुष्टि बढ्दै गएको देखिन्छ। धेरै लगानीकर्ताहरूले शेयर बिक्रीपछिको भुक्तानी ढिला हुने, शेयर ट्रान्सफरमा समय लाग्ने तथा समस्या पर्दा सम्बन्धित निकायसँग सम्पर्क गर्न कठिन भएको गुनासो गर्दै आएका छन्।

लगानीकर्ताहरूले यस्ता प्राविधिक तथा सेवा सम्बन्धी समस्याले कारोबारमै असर पर्ने भएकाले कम्पनीले यसतर्फ गम्भीर ध्यान दिनुपर्ने बताएका छन्। साथै, नासा सेक्युरिटिजले लगानीकर्ताका गुनासा छिटो सम्बोधन गर्दै सेवा सुधारमा आवश्यक कदम चाल्ने अपेक्षा गरिएको छ।