आज सार्वजनिक बिदा: नेपाल स्टक एक्सचेन्ज बन्द, श्रमिक दिवस र बुद्ध जयन्ती देशभर मनाइँदै

काठमाडौं । आज देशभर विभिन्न ऐतिहासिक तथा धार्मिक महत्त्व बोकेका अवसरहरू एकैसाथ परेकाले सार्वजनिक बिदा दिइएको छ र यसका कारण नेपाल स्टक एक्सचेन्ज (नेप्से) पनि आज बन्द रहेको छ।

आज अन्तर्राष्ट्रिय श्रमिक दिवस विश्वभर विविध कार्यक्रमसहित मनाइँदैछ। सन् १८८६ मा अमेरिकाको शिकागो मा सुरु भएको ‘आठ घन्टा काम, आठ घन्टा आराम र आठ घन्टा मनोरञ्जन’ भन्ने नारासहितको मजदुर आन्दोलनको सम्झनामा यो दिवस मनाउने परम्परा सुरु भएको हो। पछि सन् १८८९ मा पेरिस मा भएको अन्तर्राष्ट्रिय श्रम सम्मेलनले हरेक वर्ष मे १ लाई श्रमिक दिवसका रूपमा मनाउने निर्णय गरेको थियो। नेपालमा पनि विभिन्न ट्रेड युनियनहरूले सभालगायत कार्यक्रम आयोजना गरी यो दिवस मनाइरहेका छन्।

यसैगरी आज २५७०औँ बुद्ध जयन्ती पनि मनाइँदैछ। शान्ति, अहिंसा र सत्यका मार्गदर्शक गौतम बुद्ध को जन्म, ज्ञान प्राप्ति र महापरिनिर्वाण यही वैशाख पूर्णिमाकै दिन भएको मानिन्छ। बुद्धको जन्म हालको कपिलवस्तु क्षेत्रमा भएको विश्वास गरिन्छ र यस अवसरमा देशभर पूजा, आराधना तथा प्रवचन कार्यक्रम भइरहेका छन्।

साथै, किराँत समुदायले उभौली पर्वका रूपमा प्रकृतिपूजा र सांस्कृतिक कार्यक्रम गर्दैछन्। यी सबै अवसरहरूका कारण आज सरकारी कार्यालय, बैंक तथा वित्तीय संस्था, बीमा कम्पनीहरू बन्द छन्।

सार्वजनिक बिदासँगै आज नेपाल स्टक एक्सचेन्ज  आज बन्द रहेको छ। भोलि शनिबार र पर्सि आइतबार साप्ताहिक बिदा परेकाले नेप्सेसहित सबै सेवा अब सोमबार (वैशाख २१) देखि मात्र पुनः सञ्चालनमा आउनेछ।