सिद्धार्थ बैंकको नाफा २०.७८% बढ्यो, इपीएस १७.६२ रुपैयाँ

नेप्सेमा सूचीकृत वाणिज्य बैंक सिद्धार्थ बैंक लिमिटेड (SBL) ले चालु आर्थिक वर्षको तेस्रो त्रैमाससम्मको अपरिष्कृत वित्तीय विवरण सार्वजनिक गरेको छ। सार्वजनिक विवरणअनुसार बैंकको खुद नाफा र प्रतिसेयर आम्दानी दुवैमा सुधार देखिएको छ।

चालु आर्थिक वर्षको पहिलो ९ महिनामा बैंकले २ अर्ब १ करोड ४८ लाख रुपैयाँ खुद नाफा आर्जन गरेको छ, जुन गत वर्षको सोही अवधिको तुलनामा २०.७८ प्रतिशतले बढी हो। अघिल्लो वर्ष सोही अवधिमा बैंकको नाफा १ अर्ब ६६ करोड ८२ लाख रुपैयाँ रहेको थियो।

आम्दानीको पाटोबाट हेर्दा बैंकको खुद ब्याज आम्दानी ६ अर्ब ५२ करोड रुपैयाँ पुगेको छ, जुन अघिल्लो वर्षको ६ अर्ब ३३ करोड रुपैयाँको तुलनामा ३.०४ प्रतिशतले बढी हो। यसैगरी कुल सञ्चालन आम्दानी ८.२५ प्रतिशतले बढेको छ भने सञ्चालन मुनाफा २३.४५ प्रतिशतले वृद्धि भएको छ।

लाभांश क्षमतातर्फ बैंकको आधार बलियो छ। समीक्षा अवधिमा बैंकको वितरणयोग्य मुनाफा २ अर्ब ९९ करोड ९४ लाख रुपैयाँ रहेको छ।

पुँजी संरचनातर्फ बैंकको चुक्ता पुँजी १८ अर्ब २९ करोड रुपैयाँ रहेको छ भने जगेडा कोषमा १७ अर्ब २६ करोड रुपैयाँ सञ्चित छ।

व्यवसाय विस्तारतर्फ समीक्षा अवधिमा बैंकले ३ खर्ब ३ अर्ब रुपैयाँ निक्षेप संकलन गरेको छ भने २ खर्ब ३० अर्ब रुपैयाँ कर्जा प्रवाह गरेको छ।

प्रति सेयर सूचकहरूतर्फ चैत मसान्तसम्ममा बैंकको प्रतिसेयर आम्दानी (इपीएस) २ रुपैयाँ ४९ पैसाले बढेर १७ रुपैयाँ ६२ पैसा पुगेको छ। प्रतिसेयर नेटवर्थ २१६ रुपैयाँ ७३ पैसा रहेको छ भने मूल्य आम्दानी अनुपात (पीई रेसियो) २२.२५ गुणा कायम भएको छ।