अतिक्रमण गरिएका ऐलानी तथा पर्ति जग्गा खाली गराउन पोखरा महानगरको ३५ दिने अल्टिमेटम

पोखरा । पोखरा महानगरपालिकाले सार्वजनिक ऐलानी तथा पर्ति जग्गा अतिक्रमण गरी निर्माण गरिएका संरचना ३५ दिनभित्र हटाउन सम्बन्धित व्यक्ति तथा संस्थालाई निर्देशन दिएको छ।

महानगरपालिकाले महानगर क्षेत्रभित्र विभिन्न स्थानमा सार्वजनिक जग्गा बिना अनुमति अतिक्रमण गरी पहुँचका आधारमा लामो समयदेखि संरचना निर्माण गरेर कार्यालय सञ्चालन गर्ने, भाडामा लगाउने, पर्खाल लगाएर जग्गा आफ्नो नियन्त्रणमा लिने जस्ता काम भइरहेको जनगुनासो आएको जनाउदै यस्ता गतिविधिले सार्वजनिक सम्पत्तिको संरक्षणमा असर परेको भन्दै सबै सरोकारवाला व्यक्ति तथा संस्थालाई सार्वजनिक जग्गा संरक्षणमा एक्यबद्धता जनाउन आग्रह गरेको छ ।

हालसम्म सार्वजनिक जग्गामा निर्माण गरिएका सबै संरचना सूचना प्रकाशित भएको मितिले ३५ दिनभित्र स्वयं खाली गर्न, गराउन तथा हटाउन महानगरपालिकाले आग्रह गरेको छ ।