बालेन सरकारका कुन मन्त्रीको कति सम्पत्ति छ ?

काठमाडौं । सरकारले प्रधानमन्त्री र मन्त्रीहरूको सम्पत्ति विवरण सार्वजनिक गरेको छ । आइतबार प्रधानमन्त्री तथा मन्त्रिपरिषद् कार्यालयले प्रधानमन्त्री बालेन्द्र शाह (बालेन) सहित मन्त्रीहरूको सम्पत्ति विवरण सार्वजनिक गरेको हो ।

भ्रष्टाचार निवारण आयोग ऐन, २०५९ को दफा ५० मा ‘सार्वजनिक पद धारण गरेको ६० दिनभित्र र त्यसपछि हरेक नयाँ आर्थिक वर्ष समाप्त भएको ६० दिनभित्र सम्पत्ति विवरण नेपाल सरकारले नेपाल राजपत्रमा सूचना प्रकाशन गरी तोकेको निकाय वा अधिकारीसमक्ष पेस गर्नुपर्ने’ उल्लेख छ । यसअघिको सुशिला कार्की नेतृत्वको सरकारले आफ्नो ६ महिने कार्यकालमा सम्पत्ति विवरण सार्बजनिक गरेको थिएन ।

प्रधानमन्त्री बालेन शाहको सम्पत्ति विवरण उनकी पत्नी सविना काफ्लेको नाममा १९० तोला गरगहना रहेको उल्लेख छ । सुन, चाँदी, हिरा लगायतका गरगरहना १९० तोला गरगहना रहेको सम्पत्ति विवरणमा उल्लेख छ । उक्त सम्पत्ति प्राप्तिको स्रोत ‘पैत्रिक’ रहेको सम्पत्ति विवरणमा उल्लेख छ । त्यस्तै बालेनको नाममा काठमाडौँमा ५ आना जग्गा र धनुषामा १.२ बिघा जग्गा रहेको उल्लेख छ । त्यस्तै महोत्तरीमा ९ बिघा जग्गा आफ्ना पिता राम नारायण शाहको नाममा रहेको उल्लेख  छ । त्यस्तै बालेनसँग विभिन्न बैंकमा नगद एक करोड ४६ लाख रहेको र सो रकम सामाजिक सञ्जाल फेसबुक, युट्युब, टिकटकलगायतबाट भएको आम्दानी रहेको विवरणमा उल्लेख छ । त्यस्तै उनले आफ्नो सम्पतिमा फेसबुक, युट्युबका फलोअरको संख्यासमेत उल्लेख गरेका छन् ।

अर्थमन्त्री डा. स्वर्णिम वाग्लेको सार्वजनिक सम्पत्ति विवरण अनुसार अर्थमन्त्री वाग्लेसँग चारवटा घर/अपार्टमेन्ट र १ करोड ९० लाख बैंक ब्यालेन्स रहेको छ । उनको ललितपुरको सानेपामा २ करोडको अपार्टमेन्ट, ललितपुरमा ५ करोडको, काभ्रेमा ३ करोड ७५ लाखको अपार्टमेन्ट र  तनहुँमा २ करोडको घर रहेको  विवरणमा उल्लेख छ। उनले प्राप्तिको स्रोतमा अन्तर्राष्ट्रिय रोजगारी निजी निवास बिक्री, अन्तर्राष्ट्रिय रोजगारी, बैंक ऋण तथा व्यक्तिगत सापटी रहेको उनले उल्लेख गरेका छन् । उनको साढे ४ करोड बराबरको सेयर रहेको छ ।

परराष्ट्रमन्त्री शिशिर खनालको सम्पत्ति विवरणअनुसार उनको काठमाडौंको टोखामा एउटा घर रहेको छ । यसबाहेक उनको नाममा तनहुँ, नवलपुर र बाँकेको नेपालगञ्जमा समेत जग्गा रहेको खुलेको छ । मन्त्री खनालसँग २२ तोला सुन र २५ तोला चाँदी रहेको छ। त्यस्तै, उनले आफूसँग १० लाख रुपैयाँ नगद मौज्दात रहेको विवरणमा उल्लेख छ । उनले बैंकबाट ऋृण लिएर ४० लाखमा ‘डङफेङ विगो’ गाडी खरिद गरेको उल्लेख छ । 

शिक्षा विज्ञान तथा प्रविधि मन्त्री सस्मित पोखरेलको सार्वजनिक सम्पत्ति विवरण अनुसार उनको कुल सम्पत्ति २४ करोड १६ लाख २७ हजार रुपैयाँ छ । कुल सम्पत्तिमध्ये २३ करोड ४१ लाख २७ हजार उनको खुद सम्पत्ति हो । जसमा ७५ लाख रुपैयाँ ऋण रहेको छ ।  

ऊर्जामन्त्री विराजभक्त श्रेष्ठले सुन १५ तोला र चाँदी ५० तोला रहेको विवरण पेस गरेका छन् । यस्तै चार आना पैतृक जग्गा रहेको विवरणमा उल्लेख छ । यस्तै उनले शेयरमा एक करोड ४५ लाख ४८ हजार ४२० लगानी रहेको विवरणमा उल्लेख छ । त्यस्तै उनले विभिन्न बैंकमा करिब ७९ लाख नगद रहेको विवरणमा उल्लेख गरेका छन् । त्यस्तै उनीसँग दुई वटा गाडी र एक स्कुटर रहेको तिनैको कुल मुल्य  ३० लाख ७१ हजार रहेको उल्लेख छ । त्यस्तै उनले ३ लाख बराबर मूल्यका विभिन्न ब्रान्डका घडी रहेको विवरणमा उल्लेख गरेका छन् ।

गृहमन्त्री सुदन गुरुङको सम्पत्ति विवरण अनुसार मन्त्री गुरुङको विभिन्न बैंकमा ६१ लाख ३५ हजार नगद रहेको छ भने शेयर बजारमा ४ करोड भन्दा बढीको लगानी रहेको छ । गुरुङको होप होल्डिङ्स प्रालिमा ३० लाख बराबरको ३० हजार थान साधारण शेयर रहेको उल्लेख छ भने लगुम प्रिमियम अपार्टमेन्ट्स प्रालिमा ५७ लाख बराबरको ५ हजार ७ सय थान साधारण सेयर रहेको उल्लेख छ । त्यस्तै, धितोपत्र बजारमा २ करोड ७४ लाख ५६ हजार बराबरको शेयर रहेको उल्लेख गरेका छन् । त्यसैगरी मन्त्री गुरुङको एड्भेन्चर भिल्ला प्रालिमा ७० लाख बराबरको ७० हजार थान शेयर रहेको विवरणमा उल्लेख गरेका छन् । त्यस्तै उनले पत्रिक सम्पत्तिमा ८९ तोला सुन र ६ किलो चाँदी रहेको विवरण पेश गरेका छन् । त्यसैगरी उनको धनकुटामा लगानीबाट प्राप्त आय बाट १९ रोपनी १५ आना जग्गा रहेको उल्लेख गरेका छन् भने चितवनमा पिता दिल बहादुर गुरुङको नाममा ३० कठ्ठा  र गोरखामा बाजे रामसल गुरुङ तथा परिवार (बाँडफाँड नभएको)  को नाममा २२१ रोपनी जग्गा रहेको उल्लेख छ । 

कानुन, न्याय तथा संसदीय मामिला मन्त्री सोविता गौतमको बैंकमा नगद १० लाख ५० हजार रहेको उल्लेख छ भने उनले गाडी खरिदका लागि राष्ट्रिय वाणिज्य बैंकबाट २० लाख लिएको र त्यसमा ७ लाख तिरेको उल्लेख छ । त्यस्तै एभरेष्ट बैंकबाट गाडी खरिदकै लागि २५ लाख ऋण लिएको सम्पत्ति विवरणमा उल्लेख छ । उनीसँग १५ तोला सुन, ९ तोला चादी र १ तोला हिरा रहेको छ भने श्रीमान गृहेन्द्र घिमिरेले एभरेष्ट बैंकबाट ९५ लाख ऋण लिएर बा ३ च ६७२२ नम्बरको गाडी खरिद गरेको उल्लेख छ । 

भौतिक पूर्वाधार मन्त्री सुनिल लम्सालको ३० रोपनी पैतृक सम्पत्ति विवरणमा उल्लेख छ भने ११ कठ्ठा २५ धुर जमिन रहेको छ । त्यस्तै ३० तोला सुन र ५० तोला चाँदी तथा विभिन्न बैंकमा ९० लाख रूपैयाँ मौज्दात रहेको उल्लेख छ ।

संघीय मामिला तथा सामान्य प्रशासन, भूमि व्यवस्था सहकारी तथा गरिबी निवारणमन्त्री प्रतिभा रावलको सम्पत्ति विवरणमा काठमाडौंको बूढानीलकण्ठमा ७० लाख र बारामा ५० लाखको जग्गा रहेको उल्लेख छ । उनले यी जग्गा खरिदको स्रोत श्रीमान्‌को आय उल्लेख गरेकी छन् । त्यस्तै आफूसँग २५ तोला सुन रहेको र विभिन्न बैंकमा २४ लाख बढी रकम बचत रहेको विवरण पेश गरेकी छन् भने २० लाख रुपैयाँ एभरेष्ट बैंकबाट २०८२ साल जेठमा ऋण लिएको पनि उल्लेख गरेकी छन् । त्यस्तै ४४ लाखको गाडी पनि रहेको उनको सम्पत्ति विवरणमा उल्लेख छ ।

कृषि तथा पशुपन्छी र वन तथा वातावरण मन्त्री गीता चौधरीको सार्वजनिक सम्पत्ति विवरणमा ५० हजार रुपैयाँ पर्ने घडी, ९० हजारको मोबाइल र ७५ हजार बराबरको ल्यापटप रहेको उल्लेख छ । त्यस्तै ५ तोला सुन र १०० तोला चाँदी रहेको छ भने ५ बैंकमा १ लाख २६ हजार रुपैयाँ नगद रहेको विवरणमा उल्लेख छ । मन्त्री चौधरीले ऋणमा स्कुटर खरिद गरेको र स्कुरट खरिद गर्दा लिएको १ लाख ५० हजार मध्ये ८४ हजार रुपैयाँ भुक्तानी गरेको उल्लेख छ । स्वआर्जनबाट ३ लाख ३० हजार मूल्यको अर्को पनि स्कुटर रहेको सम्पत्ति विवरणमा उल्लेख छ । सम्पत्तिको नाममा माइतीले दिएको २ वटा बाख्रा र १० कुखुरा रहेको उल्लेख छ ।

महिला बालबालिका तथा ज्येष्ठ नागरिक मन्त्री सीता वादीले आफ्नो सम्पत्ति विवरणमा २० कुखुरा र एउटा कुकुर पनि उल्लेख गरेकी छन । सार्वजनिक सम्पत्ति विवरणमा उनले आफूसँग स्कुटर, तीन ल्याप्टप र २ वटा मोबाइल रहेको उल्लेख गरेकी छन् । उनको श्रीमानको पल्सर मोटरसाइकल रहेको उल्लेख छ भने नगद ५० हजार र बैंकमा श्रीमानको सहित १५ लाख रहेको उल्लेख छ । मन्त्री वादीसँग सुन १८ तोला र चाँदी १५ तोला रहेको छ भने सुर्खेतमा ८९.६५ वर्ग मिटर क्षेत्रफलको जग्गा रहेको विवरणमा उल्लेख छ ।

स्वास्थ्य मन्त्री निशा मेहताको सम्पत्ति विवरण अन्यसर ३० तोला सुनको गरगहना र ५० तोला चाँदी रहेको उल्लेख छ । मन्त्री मेहताको काठमाडौंको सौखेलमा ७ आना जग्गा, माछापुच्छ्रे बैंकमा ७ लाख २३ हजार, सानिमा बैंकमा १० लाख र २५ लाखको आई १० को एउटा गाडी रहेको छ । 

उद्योग वाणिज्य मन्त्री गौरी कुमारी यादवले काठमाडौंमा २५ आना र महोत्तरीमा २९ कठ्ठा जग्गा रहेको उल्लेख गरेकी छिन् । सुन १८० तोला र चाँदी २ किलो रहेको उनको विवरण छ । श्रमन्त्री रामजी यादवले राजविराजमा ११ कठ्ठा १३ धुर जमिन रहेको उल्लेख गरेका छन् । ८० तोला सुन र १५० तोला चाँदी रहेको उनको विवरणमा उल्लेख छ। 

संस्कृति पर्यटन तथा नागरिक उड्डयनमन्त्री खड्कराज पौडेलको सम्पत्ति विवरणमा ११ तोला सुन र पाँच तोला चाँदी रहेको उल्लेख छ । यस्तै विभिन्न स्थानमा जग्गा रहेको उनको विवरण छ । करिब २५ लाख नगद रहेको उनले उल्लेख गरेका छन् । त्यसैगरी उनले एक करोड ४० लाख ऋण रहेको विवरणमा उल्लेख गरेका छन् । त्यस्तै उनले ३९ लाख बराबरका एक जीप र २ स्कुटर किनेको उल्लेख गरेका छन् ।  

सञ्चार तथा सूचना मन्त्री विक्रम तिम्लसिनाले सम्पत्ति विवरणमा नागार्जुनमा १४२.७० बर्ग मित्रमा जग्गा रहेको उल्लेख छ भने करिब ५ तोला सुन र चाँदी १० तोला रहेको विवरण उल्लेख गरेका छन् । उनले १० लाख २५ हजार नगद रहेको खुलाएका छन् । त्यसैगरी उनीसँग २३ लाख बराबरको गाडी रहेको उल्लेख छ ।