विद्यालयहरूलाई नियमविपरीत भर्ना र शुल्क असुल नगर्न शिक्षा मन्त्रालयको निर्देशन

काठमाडौँ । शिक्षा विज्ञान तथा प्रविधि मन्त्रालयले देशभरका विद्यालयहरूलाई नियमविपरीत भर्ना र शुल्क असुल नगर्न कडा निर्देशन दिएको छ।

मन्त्रालयका अनुसार केही विद्यालयहरूले शिक्षा नियमावली, २०५९ (संशोधन सहित) तथा सर्वोच्च अदालतको आदेश उल्लङ्घन गर्दै नयाँ शैक्षिक सत्र सुरु हुनुअघि नै विद्यार्थी भर्ना गर्ने र अत्यधिक शुल्क असुल्ने गरेको तथ्य फेला परेको भन्दै यसप्रति मन्त्रालयले गम्भीर ध्यानाकर्षण जनाएको छ ।

विद्यालय सञ्चालन जस्तो जिम्मेवार क्षेत्रमा यस्ता गैरकानुनी कार्य अशोभनीय मात्र नभई दण्डनीय हुने मन्त्रालयले स्पष्ट पर्दै कानुनी व्यवस्था र अदालतको आदेशअनुसार शैक्षिक सत्र सुरु भएपछि मात्रै भर्ना गर्न तथा तोकिएको मापदण्डबाहेक अन्य शुल्क नलिन निर्देशन दिइएको छ।

मन्त्रालयले स्थानीय तहहरूलाई समेत निर्देशन दिँदै कानुनविपरीत असुल गरिएको भर्ना शुल्क अभिभावकलाई फिर्ता गराउन आवश्यक प्रक्रिया अघि बढाउन आग्रह गरेको छ । साथै तोकिएको समयभित्र शुल्क फिर्ता नगर्ने विद्यालयलाई शिक्षा ऐन, २०२८ अनुसार कारबाही गरिने चेतावनी दिइएको छ । मन्त्रालयका सहसचिव तथा प्रवक्ता शिवकुमार सापकोटाले सबै पक्षलाई कानुन पालना गर्न आग्रह गरेका छन् ।