नेप्सेमा फेरि सर्किट ब्रेकर, कारोबार १२:०१ बजेबाट पुनः खुल्ने

२५ फागुन, काठमाडौं । नेपाल स्टक एक्सचेन्ज (नेप्से) परिसूचकमा तीव्र वृद्धि भएपछि आज दोस्रो पटक सर्किट ब्रेकर लाग्दै शेयर कारोबार पुनः केही समयका लागि रोकिएको छ।

बजार पुनः खुलेपछि नेप्से परिसूचक ५ प्रतिशतले बढेर २,८४८.२२ विन्दु पुगेपछि सर्किट ब्रेकर लाग्दै कारोबार स्थगित गरिएको हो। नेप्से नियमअनुसार ५ प्रतिशतको वृद्धिमा ४० मिनेटका लागि कारोबार रोक्ने व्यवस्था रहेको छ।

यसअनुसार रोकिएको शेयर कारोबार १२:०१ बजेबाट पुनः सञ्चालन हुने नेप्सेले जनाएको छ।

हालसम्म बजारमा २३९ कम्पनीको शेयर मूल्य बढेको, १ कम्पनीको घटेको र कुनै पनि कम्पनीको मूल्य स्थिर नरहेको देखिएको छ।

त्यस्तै, बजार रोकिँदासम्म करिब २८ करोड ५१ लाख रुपैयाँभन्दा बढीको कारोबार भइसकेको छ भने ५ लाख ३५ हजारभन्दा बढी कित्ता शेयर किनबेच भएको तथ्यांकले देखाएको छ।