नेप्सेमा सर्किट ब्रेकर, कारोबार ११:२१ बजेबाट पुनः खुल्ने

९ चैत, काठमाडौं । नेपाल स्टक एक्सचेन्ज (नेप्से) परिसूचकमा तीव्र वृद्धि भएपछि बजारमा सर्किट ब्रेकर लाग्दै कारोबार केही समयका लागि रोकिएको छ।

आज कारोबार सुरु भएको केही समयमै नेप्से परिसूचक करिब ४ प्रतिशतले बढेर २,८२१.१० विन्दु पुगेपछि बजारमा सर्किट ब्रेकर लाग्दै कारोबार स्थगित गरिएको हो।

सर्किट ब्रेकरका कारण रोकिएको कारोबार ११:२१ बजेबाट पुनः खुल्ने जानकारी नेप्सेले दिएको छ।

बजार खुल्दा अधिकांश कम्पनीको शेयर मूल्य बढेको देखिएको छ। हालसम्म २२५ कम्पनीको शेयर मूल्य बढेको, १ कम्पनीको घटेको र कुनै पनि कम्पनीको मूल्य स्थिर नरहेको तथ्यांकले देखाएको छ।

त्यस्तै, बजार बन्द हुँदासम्म करिब १८ करोड ९६ लाख रुपैयाँ बराबरको कारोबार भइसकेको छ।