बदलिएको देश र बदल्नुपर्ने काँग्रेस बारे महामन्त्री शर्माले पेश गरे बन्दसत्रमा प्रतिवेदन

काठमाडौं । नेपाली कांग्रेसको विशेष महाधिवेशनको बन्दसत्रमा महामन्त्री विश्वप्रकाश शर्माले राजनीतिक र सांगठनिक प्रतिवेदन प्रस्तुत गरेका छन् ।

प्रतिवेदन प्रस्तुत गर्दै महामन्त्री शर्माले प्रधानमन्त्रीको कार्यकाल, गैरआवासीय नेपाली नागरिकका मुद्दा, राजनीतिक नियुक्ति, पार्टीभित्र उमेदवार चयनलगायत विषयमा सुधारको प्रस्ताव गरेका छन् ।

शर्माले चुनाव हुने, नयाँ सरकार बन्ने तर प्रधानमन्त्री पुरानै हुने अभ्यासलाई सच्याउनुपर्ने प्रतिवेदनमा उल्लेख गर्दै कांग्रेसको तर्फबाट भविष्यमा कोही पनि दुईपटकभन्दा बढी प्रधामन्त्री बन्ने नपाउने व्यवस्था गर्न प्रस्ताव गरेका छन् ।

त्यस्तै महामन्त्री शर्माले गैरआवासीय नेपाली नागरिकलाई मतदानको अधिकार सुनिश्चित गरिने जनाएका छन् । प्रतिवेदनमा संविधानको भावना र सम्मानित सर्वोच्च अदालतको आदेशबमोजिमको बन्दोबस्त मिलाउन सहजीकरण, दबाब र नेतृत्वको भूमिका निभाउने संकल्प यो विशेष महाधिवेशनले गर्ने उल्लेख गरेका छन् ।

पार्टीभित्र उमेदवार सिफारिस गर्न प्राइमरी चुनाव गर्ने प्रस्ताव गरेका छन् । उनले आफ्नो प्रतिवेदनमा प्रशासनिक ढिला सुस्तीको निराकरणको खोजी, सामाजिक विसंगति विरुद्ध सजगता, बीमा ब्रान्डिङ, अनौपचारिक क्षेत्रका श्रमिक सम्पर्क, लागु पदार्थ विरुद्ध युवा अभियान, स्वदेश फर्किएकालाई स्वदेशमै पुनर्स्थापित गर्ने योजना, शैक्षिक क्षेत्रको सुधार, पार्टी सदस्यको आत्मनिर्भर उद्यम अभियान जस्ता विषय आफ्नो प्रतिवेदनमा उल्लेख गरेका छन् ।

उनले पार्टीले विगतका गल्तिहरुको पहिचान गरेर सच्याउने र त्यसलाई कार्यान्वयन गर्ने उल्लेख छ ।  साथै उनले आगामी निर्वाचनमा कुनै पनि दल सँग गठबन्धन नगरेर निर्वाचनमा जाने प्रस्ताव गरेका छन् ।