पाकिस्तान इन्टरनेशनल एयरलाइन्सको स्वामित्व १३५ अर्बमा आरिफ हबिब समूहलाई बिक्री

९ पुस, सुनसरी ।A पाकिस्तान इन्टरनेशनल एयरलाइन्स (पीआईए) को सरकारी स्वामित्व निजी कम्पनी आरिफ हबिब समूहलाई बिक्री गरिएको छ । आरिफ हबिब समूहले पीआईएलाई १३५ अर्ब पाकिस्तानी रुपैयाँ अर्थात ६९.१६ अर्ब नेपाली रुपैयाँमा अधिग्रहण गरेको छ ।

पाकिस्तानी सरकारले एयरलाइन्सको लागि आरिफ हबिब समूहले शुरुमा ११५ अर्ब पाकिस्तानी रुपैयाँ प्रस्ताव गरेपनि बढाएर १३५ अर्ब पुर्याएको थियो । त्यस्तै अर्को प्रतिष्पर्धी लकी सिमेन्ट समूहले १०१.५ अर्बबाट १३४ अर्बको बोली लगाएको थियो । दुवैले पहिलो चरणमा १०० अर्बभन्दा बढीको बोलि लगाएपछि उनीहरुलाई दोस्रो चरणमा प्रतिष्पर्धा गराइएको थियो । तेस्रो प्रस्तावक निजी एयरलाइन्स एयरब्लूले पहिलो चरणमा २६.५ अर्ब बोली लगाएको थियो ।

एयरलाइन्स बेच्नुको सबैभन्दा ठूलो कारण आईएमएफको नीति हो । पाकिस्तानलाई आईएमएफबाट ७ अर्ब डलरको ऋण चाहिन्छ । बदलामा, आईएमएफले पाकिस्तानमा घाटामा रहेका सरकारी कम्पनीहरूलाई निजीकरण गर्नुपर्ने शर्त रहेको छ । यस अवस्थामा, पाकिस्तानले पीआईएसहित आफ्ना २४ सरकारी कम्पनीहरूलाई निजीकरण गर्दैछ ।

पीआईए बेच्नुको अर्को कारण एयरलाइन्सलाई पुनर्जीवित गर्नु हो, किनकि सरकार वित्तीय अवरोधका कारण पीआईएमा लगानी गर्न असमर्थ छ । पीआईएको कमजोर व्यवस्थापनबाट यात्रुहरू पनि समस्यामा छन् ।

कराँचीमा पीआईएको एउटा विमान दुर्घटनाग्रस्त भयो, जसमा ९६ जनाको मृत्यु भयो । एक अनुसन्धानले २५० भन्दा बढी पीआईए पाइलटहरूको लाइसेन्स शंकास्पद वा नक्कली भएको पत्ता लगाएको थियो । दुर्घटनाले पीआईएको छवि धमिलो बनायो र धेरै देशहरूले पीआईए उडानहरूमा प्रतिबन्ध लगाए । प्रतिबन्धले पीआईएको घाटा निम्त्यायो, कम्पनीलाई लगभग २५ हजार करोडको ऋण लगाएको छ ।

हाल, पाकिस्तानको उड्डयन क्षेत्रले यसको जीडीपीमा केवल १.३ प्रतिशत योगदान गर्दछ । निजीकरणले यस योगदानमा वृद्धि हुन सक्ने अनुमान गरिएको छ ।

पाकिस्तानले १९५८ देखि २० पटक आईएमएफबाट ऋण लिएको छ । आईएमएफको दबाबमा यसले धेरै कठिन निर्णयहरू गरेको छ । यस सन्दर्भमा, पाकिस्तानले पहिले नै आफ्नो बन्दरगाह र विमानस्थलहरू बेचेको छ । गत वर्ष, पाकिस्तानले इस्लामाबाद विमानस्थल भाडामा दिने निर्णय गरेको थियो ।

यो ७५ प्रतिशत बोली रकममध्ये ९२.५ प्रतिशत सिधै पिआइएमा जानेछ, जबकि ७.५ प्रतिशत मात्र राष्ट्रिय कोषमा जाने बताइएको छ ।