अमेरिकाको केन्टकीमा कार्गो विमान दुर्घटना, ७ जनाको मृत्यु

१९ कात्तिक, काठमाडौं । अमेरिकाको केन्टकी राज्यको लुइसभिल विमानस्थलबाट उडान भरिरहेको एक कार्गो विमान दुर्घटनाग्रस्त भएको छ।

उडानका केही क्षणमै भएको दुर्घटनापछि विमानमा भीषण आगलागी भएको थियो। प्रारम्भिक जानकारी अनुसार ७ जनाको मृत्यु पुष्टि भएको छ भने कम्तीमा ११ जना घाइते भई उपचाररत छन्। साथै, धेरै जना अझै बेपत्ता रहेको अमेरिकी अधिकारीहरूले जनाएका छन्।

विमानले करिब ३८ हजार ग्यालन इन्धन बोकेको थियो, जसको विस्फोटपछि आगो तीव्र रूपमा फैलिएको र नजिकका व्यवसायिक क्षेत्रहरू समेत ध्वस्त भएको जनाइएको छ।

दुर्घटनाग्रस्त विमान युपीएस (UPS) कम्पनीको कार्गो उडान रहेको र त्यसमा तीन जना चालक दलका सदस्य सवार थिए।

अमेरिकी संघीय उड्डयन प्रशासन (FAA) का अनुसार, विमान हवाईका लागि तय गरिएको उडान २९७६ थियो, जसले स्थानीय समय दिउँसो १:१५ बजे दुर्घटना व्यहोरेको हो। दुर्घटनाको कारणबारे अनुसन्धान जारी छ।