घट्यो पेट्रोलियम पदार्थको मूल्य

 काठमाडौं, भदौ १५ । नेपाल आयल निगमले पेट्रोलियम पदार्थको मूल्यमा समायोजन गरेको छ । इण्डियन आयल कर्पोरेशनले मूल्य परिमार्जन गरेर पठाएपछि निगमले नयाँ खुद्रा मूल्य लागू गरेको हो, जसअनुसार सोमबारदेखि नयाँ मूल्य कार्यान्वयन हुनेछ।

निगमका अनुसार डिजेल र मट्टीतेलमा प्रति लिटर रु. ४ ले मूल्य घटाइएको छ । यस्तै, हवाई इन्धन आन्तरिकतर्फ प्रति लिटर रु. १ र अन्तर्राष्ट्रिय उडानका लागि काठमाडौँमा प्रति किलोलिटर ७ अमेरिकी डलरले सस्तो भएको छ ।

यद्यपि पेट्रोलको मूल्य घटेर आए पनि खुद्रा बिक्री मूल्य यथावत राखिएको छ । सोहीसँगै, एलपी ग्यासको खुद्रा बिक्री मूल्य पनि परिवर्तन नगरिएको निगमले स्पष्ट पारेको छ ।