सागर ढकालको रुपन्देही ३ बाट उम्मेदवारीको संकेत : "यो चुनाव जनता भर्सेस राणा शासन हो।"

रुपन्देही — पछिल्लो संघीय चुनावमा डडेलधुरा क्षेत्रबाट तत्कालीन प्रधानमन्त्री शेरबहादुर देउवालाई सशक्त चुनौती दिएका स्वतन्त्र युवा नेता सागर ढकालले अब रुपन्देही ३ मा उपनिर्वाचनमा उम्मेदवारी दिने संकेत दिएका छन्।

राष्ट्रिय प्रजातन्त्र पार्टी (राप्रपा) का सांसद दीपक बोहराको निधन भएसँगै रिक्त भएको यो क्षेत्रमा उपनिर्वाचनको तयारी भइरहेको छ। र यस्तै बेला, ढकालले सामाजिक सञ्जालमा भावुक र आक्रामक शैलीमा लेखिएको एक पोस्ट सार्वजनिक गरेका छन्, जसमा उनले इतिहास रच्ने आह्वान गर्दै सत्ता गठबन्धनप्रति कडा प्रहार गरेका छन्।

पोस्टमा उनले लेखेका छन्,

“चितवन २ मा रविको ५४,१७६ र काठमाडौंमा बालेनको ६१,७६७ मत। अब रुपन्देही ३ मा करिब ९०,००० मत छन्, त्यसमा तपाइ हामीले ६२,००० मत पार गर्नुपर्छ र नेपालको इतिहास रच्नुपर्छ।”
उनले नेपाली राजनीति नियन्त्रण गर्दै आएका कांग्रेस, एमाले र माओवादीलाई एउटै भनिरहेका छन् र तिनको "राणा शासनको अन्त्य" गर्नुपर्ने आवश्यकता औंल्याएका छन्।

ढकालले यो चुनावलाई “जनता vs राणा शासन” को रूप दिएको देखिन्छ। साथै नारायणगढ–बुटवल सडकखण्डमा भएको ढिलाइ, न्याय प्रणालीको निष्पक्षता, र जनताको उज्यालो भविष्यका लागि यो निर्वाचन निर्णायक हुने बताएका छन्।

उनको भनाइले रास्वपाबाट उम्मेदवारी दिने सम्भावना बलियो देखिएको छ। तर आधिकारिक घोषणाको पर्खाइ अझै बाँकी छ।

यसरी, दादेलधुराबाट "पुरानो सत्ता संरचना विरुद्धको विद्रोह" का रुपमा उदाएका सागर ढकालले अब रुपन्देही ३ बाट नेपाली राजनीतिमा नयाँ अध्याय सुरु गर्ने संकेत गरेका छन्।