युवा तथा खेलकुद मन्त्रालयलाई ६ अर्ब ८ करोड रुपैयाँ बजेट विनियोजन

काठमाडौं, १५ बैशाख । सरकारले आगामी आर्थिक वर्ष २०८२/०८३ का लागि युवा तथा खेलकुद मन्त्रालयलाई ६ अर्ब ८ करोड रुपैयाँ बजेट विनियोजन गरेको छ। अघिल्लो वर्षको तुलनामा यो २ करोड ५८ लाखले बढी हो।

अर्थमन्त्री विष्णु पौडेलले खेल पूर्वाधार निर्माण, खेलाडीको व्यावसायिकता विकास, र निजी क्षेत्रको लगानी आकर्षणमा जोड दिँदै दमकमा अन्तर्राष्ट्रिय स्तरको रंगशाला तथा सोलुखुम्बु र मुस्ताङमा हाइ अल्टिट्युड स्पोर्ट्स स्टेडियम निर्माण गरिने जानकारी दिए।

टीयू अन्तर्राष्ट्रिय क्रिकेट मैदानको स्तरोन्नतिका लागि ४० करोड, अन्य रंगशालाहरूका लागि ४२ करोड, र गौतम बुद्ध क्रिकेट रंगशालाको सम्पत्ति खरिदका लागि सशर्त अनुदानको व्यवस्था गरिएको छ। साथै, सुर्खेतमा १०औं राष्ट्रिय खेलकुद आयोजना गर्न ५४ करोड बजेट छुट्याइएको छ।