इलिमिनेटरमा चितवनलाई हराउँदै कर्णाली याक्स क्वालिफायर टु मा प्रवेश

काठमाडाैं, ३ पुस । नेपाल प्रिमियर लिग (एनपीएल) अन्तर्गत इलिमिनेटर खेलमा कर्णाली याक्सले चितवन राइनोजलाई २१ रनले पराजित गर्दै दोस्रो क्वालिफायरमा स्थान बनाएको छ। कर्णालीले दिएको १७६ रनको लक्ष्य पछ्याउने क्रममा चितवनले २० ओभरमा ९ विकेट गुमाउँदै १५५ रन मात्र बनाउन सक्यो। 

चितवनका लागि रवि बोपाराले ५३ रन बनाए, जसमा ३ चौका र ४ छक्का सामेल थिए। कप्तान कुशल मल्लले २१, विपिन रावलले १८, लुक बेन्स्किन्सले १६ रन बनाए भने अन्य खेलाडी उल्लेखनीय प्रदर्शन गर्न असफल रहे। 

कर्णालीका बलर जिसद मक्सुदले ३ विकेट लिए, जबकि कप्तान सोमपाल कामी र नन्दन यादवले समान २/२ विकेट झारे। 

त्यसअघि, टीयू क्रिकेट मैदानमा टस हारेर पहिला ब्याटिङ गरेको कर्णालीले निर्धारित २० ओभरमा ६ विकेट गुमाउँदै १७५ रन बनाएको थियो। ओपनर जयकिशन कोल्सावाला र विलियम बसिस्टोले अर्धशतक प्रहार गरे। जयकिशनले ५३ रन बनाउँदै आउट भए भने विलियमले ५२ रन बनाए। चाडविक वाल्टनले ४६ रनमा अविजित रहँदै कर्णालीलाई सम्मानजनक स्कोरमा पुर्‍याए। 

चितवनका बलर सोहेल तान्विरले २ विकेट लिए भने कप्तान कुशल मल्ल, रवि बोपारा र शरद भेषावकरले १/१ विकेट लिए। 

कर्णालीले लिग चरणको सुरूआतमा दुई खेल गुमाए पनि लगातार चार खेलमा जित हात पार्दै प्लेअफमा स्थान बनाएको थियो। चितवनले पनि लिग चरणमा ८ अंकसहित प्लेअफमा स्थान बनाएको थियो। तर, इलिमिनेटर खेलमा पराजित हुँदै चितवन प्रतियोगिताबाट बाहिरिएको छ। 

अब कर्णालीले दोस्रो क्वालिफायरमा जनकपुर बोल्ट्स र सुदूरपश्चिम रोयल्सबीच पराजित हुने टिमसँग फाइनल प्रवेशका लागि प्रतिस्पर्धा गर्नेछ।