भियतनाममा यागी आँधीबाट १२७ जनाको मृत्यु

काठमाडौँ – भियतनाममा यागी आँधीका कारण हालसम्म १२७ जनाको मृत्यु भएको छ भने ५४ जना बेपत्ता भएका छन्। मिडिया रिपोर्टहरूका अनुसार, शनिबारदेखि सुरु भएको आँधीले भियतनाममा भारी वर्षा, बाढी, र पहिरोको अवस्था सिर्जना गरेको छ। उत्तरी भियतनाममा हजारौं मानिस घरको छानामा फसेका छन्, र धेरैले सामाजिक सञ्जालमार्फत सहयोगको अपिल गरिरहेका छन्।

यागी आँधी भियतनाममा पछिल्लो ३० वर्षमा देखिएको सबैभन्दा शक्तिशाली आँधी हो, जसले देशको उत्तरी क्षेत्रमा ठूलो विनाश निम्त्याएको छ। फु थो प्रान्तमा फोङ चाउ पुल भत्किँदा धेरै सवारी साधनहरू बाढीमा डुबेका छन्। अधिकारीहरूले आँधी पश्चिमतर्फ सर्दै गर्दा अझ ठूलो क्षति हुनसक्ने चेतावनी दिएका छन्।

आँधीमा १५० किलोमिटर प्रतिघण्टाको गतिमा हावा चलिरहेको छ, जसका कारण बाढी र पहिरोले पुल र भवनहरूमा ठूलो क्षति पुर्‍याएको छ। यसअघि यागी आँधीले दक्षिणी चीन र फिलिपिन्समा पनि २४ जनाको ज्यान लिएको थियो।