आँखुखोला जलविद्युतको हकप्रद शेयरमा आवेदन दिने आज अन्तिम दिन

आँखुखोला जलविद्युत कम्पनी लिमिटेड (AKJCL) ले साउन २७ गतेदेखि खुला गरेको हकप्रद शेयरमा आवेदन दिन आज (भदौ १६ गते) अन्तिम म्याद रहेको छ। कम्पनीले चालू चुक्ता पूँजीको १५० प्रतिशत हकप्रद शेयर जारी गरेको छ।

यस कम्पनीले यस माध्यमबाट १ अर्ब २० करोड रुपैयाँ बराबरको १ करोड २० लाख हकप्रद शेयर, प्रत्येक १०० रुपैयाँ अंकित मूल्यमा जारी गर्नेछ।

कम्पनीले हकप्रद शेयरको निष्काशनका लागि साउन १ गते बुकक्लोज गरेको थियो, जसअनुसार असार ३१ गतेसम्म कारोबार भएका शेयरधनीहरूले यो हकप्रद शेयरमा आवेदन दिन सक्नेछन्।

इक्रा नेपालले हकप्रद निष्काशनका लागि कम्पनीलाई इक्राएनपी इस्यूअर रेटिङ्ग बी माइनस प्रदान गरेको छ, जसले कम्पनीको वित्तीय दायित्व बहन गर्ने क्षमतामा उच्च जोखिम रहेको देखाउँछ।

कम्पनीको हकप्रद शेयर निष्काशन तथा बिक्रीको प्रबन्धक नबिल इन्भेष्टमेन्ट बैंकिङ्ग लिमिटेड रहेको छ। लगानीकर्ताले नबिल इन्भेष्टमेन्ट बैंकिङ्ग, प्राइम कमर्सियल बैंक, प्रभु बैंक, माछापुच्छ्रे बैंक र कुमारी बैंकका तोकिएका शाखा कार्यालयबाट आवेदन दिन सक्नेछन्। साथै, नेपाल धितोपत्र बोर्डबाट स्वीकृत बैंक तथा वित्तीय संस्थाहरूमा सि आस्वा प्रणाली र मेरो शेयर अनलाइनमार्फत पनि आवेदन दिन सकिनेछ।

हाल कम्पनीको चुक्ता पूँजी ८० करोड रुपैयाँ रहेकोमा हकप्रद निष्काशनपश्चात यो २ अर्ब रुपैयाँ पुग्नेछ। कम्पनीले हकप्रद शेयरबाट उठेको ८० करोड रुपैयाँ गणेश हिमाल हाइड्रोपावर कम्पनीद्वारा प्रबर्द्धित आँखुखोला २ जलविद्युत आयोजनामा लगानी गर्नेछ, जसमा कम्पनीको ६० प्रतिशत स्वामित्व हुनेछ। बाँकी ४० करोड रुपैयाँ आँखुखोला १ आयोजना निर्माणका लागि लिएको दीर्घकालिन ऋणको भुक्तानीमा प्रयोग गर्ने योजना रहेको छ।